Vatnsbyssum beint að Elvari eftir 28 stiga sýningu

Elvar og félagar lentu mest 18 stigum undir gegn Stal í kvöld en þá tók Elvar til sinna mála og sá til þess að heimamenn næðu að fara með frábæran sigur af hólmi, 90-81.

Elvar endaði með heil 28 stig og frábæra skotnýtingu en hann hitti úr fjórum af sjö þriggja stiga skotum sínum, fjórum af fimm tveggja stiga skotum og úr öllum átta vítunum. Þá gaf hann níu stoðsendingar og tók fjögur fráköst, og var án nokkurs vafa maður leiksins.

Þetta var annar sigur Anwil í röð og er liðið nú að nálgast sæti í úrslitakeppninni, með 13 sigra úr 25 leikjum en enn í 11. sæti. Sex efstu liðin fara beint í 8-liða úrslit en liðin í 7.-10. sæti fara í umspil og rambar Anwil á barmi þess að komast í það.

Eftir sigurinn í kvöld mætti fólk út á völl með vatnsbyssur til að bleyta Elvar og félaga almennilega, enda er það hefð í Póllandi að fagna vorinu með vatni á annan í páskum og dagurinn kallaður „blautur mánudagur“.