„Djöfull er íslenska þjóðin orðin geðveik“

Óskar Ófeigur Jónsson skrifar 13. apríl 2026 18:44

Brynjar Karl Sigurðsson er aðalmaðurinn hjá Aþenu í Efra-Breiðholti og hefur mikla reynslu af þjálfun ungra körfuboltakrakka. vísir/Anton

Brynjar Karl Sigurðsson, þjálfari kvennaliðs Aþenu, sem tryggði sér sæti í Bónusdeild kvenna í körfubolta á dögunum, er mjög hneykslaður á einni reglu sem er dæmt eftir á yngri flokka mótum á Íslandi.

Reglan sem um ræðir gildir hjá yngstu krökkunum eða leikmönnum í 1. og 2. bekk annars vegar og leikmönnum úr 3. og 4. bekk hins vegar.

Samkvæmt reglunni er varnarmanni bannað að taka boltann af andstæðingi ef andstæðingurinn er með vald á boltanum.

Brynjar Karl hefur mikla reynslu af yngri flokka þjálfun á Íslandi en er jafnframt mjög umdeildur innan hreyfingarinnar fyrir þjálfaraaðferðir sínar þar sem hann fer vissulega sínar eigin leiðir.

Brynjar Karl mætti á yngri flokka mót á dögunum og var svo hneykslaður á fyrrnefndri reglu að hann skrifaði pistil og vakti athygli á henni á samfélagsmiðlum.

„Djöfull er íslenska þjóðin orðin geðveik,“ byrjar Brynjar pistil sinn en hann talar þar meðal annars um þroskaþjófnað sem að hans mati er stórhættulegur fyrir börnin.

„Það er kannski ekki skrítið að til sé hópur fræðimanna og forsvarsfólks í íþróttum sem lítur á mig eins og einhvern barnaþrjót, þegar reglur KKÍ hafa um nokkurt skeið sagt að börn á aldrinum 6–9 ára eigi að leika eftir reglum sem banna þeim að taka boltann af hvort öðru,“ skrifar Brynjar.

„Ég fór á mót um helgina í þessum aldri og mér krossbrá að sjá keyrt á þessa reglu. Ég hélt að enginn myndi hlusta á þetta bull. Mínir þjálfarar sögðu mér að svona hefði þetta verið í vetur. Ég tók þá á teppið og spurði hvort þeir ætluðu bara að vera „bystanders“ í þessum þroskaþjófnaði. Þetta er stórhættulegt fyrir börnin,“ skrifar Brynjar.

„Á sama tíma kemur fólk á æfingu hjá mér í Aþenu og sér krefjandi æfingar, bein samskipti og börn sem eru þjálfuð í að takast á við tilfinningar, geðshræringar, mistök, óöryggi og álag í gegnum æfingarnar sjálfar,“ skrifar Brynjar.

„Síðast þegar ég vissi var það meðal annars eðli boltaíþrótta að taka boltann af andstæðingnum. Leikur er í eðli sínu átakasvæði. Körfubolti er meira að segja tiltölulega mildur miðað við margar aðrar greinar, því vörnin má lítið annað en að snerta boltann, ekki manninn. Samt erum við komin þangað að sjálf grunnátök leiksins virðast orðin of mikið fyrir hugmyndafræði samtímans um að hlífa börnum, “ skrifar Brynjar en það má lesa allan pistil hans hér fyrir neðan.

Körfubolti Aþena

Mest lesið

Fleiri fréttir