J. Cole slítur samningi sínum í Kína

Rappstjarnan náði aðeins að spila einn leik fyrir liðið eftir að hafa skrifað undir samning í apríl.

„Atvinnuleyfið tók lengri tíma en ég átti von á, þannig að ég náði bara þessum eina leik. Ég vil þakka Nanjing og kínversku deildinni fyrir að veita mér þessa mögnuðu upplifun,“ sagði tvöfaldi Grammy-verðlaunahafinn við ESPN.

Hans eini leikur fyrir liðið var 95-81 tap gegn Guangzhou Loong Lions en Cole tókst ekki að skora í þeim leik, þrátt fyrir að taka fimm sinnum þriggja stiga skot. Hann gaf þó eina stoðsendingu og sló líka met sem elsti erlendi leikmaðurinn í sögu kínversku deildarinnar. 

Þetta var í þriðja sinn sem 41 árs gamli rapparinn reynir fyrir sér í atvinnukörfubolta.

Cole hafði áður verið á stuttum samningum hjá Rwanda Patriots árið 2021 og Scarborough Shooting Stars árið 2022. Fyrir það hafði hann ekki spilað skipulagðan körfubolta síðan í menntaskóla en alltaf verið áhugasamur um að láta reyna á hæfileikana.

Hæfileikar Cole eru þó töluvert meira áberandi við míkrafóninn en hann hefur gefið út sex platínum-plötur á sínum tónlistarferli. Nýjasta plata hans, The Fall-Off, kom út í febrúar.