Skoðunar­ferð um nýja Land­spítalann á HönnunarMars

Hátíðin stendur yfir dagana sjötta til tíunda maí en um er að ræða árlegan viðburð þar sem tilgangurinn er að vekja athygli á íslenskri hönnun. Yfir hundrað og fimmtíu viðburðir eru á hátíðinni í ár sem endurspeglar fjölbreytnina í íslenskri hönnun að sögn Klöru Rúnar Ragnarsdóttur, dagskrárstjóra Hönnunarmars. 

Hún segir meðal annars spennandi dagskrá í kringum arkitektúr á hátíðinni en boðið verður upp á leiðsagnir um rými sem almenningur hefur alla jafnan ekki aðgang að.

„Eins og til dæmis verður í boði að fara í leiðsögn um nýja Landspítalann. Hann er enn í byggingu en þarna ætla arkitektarnir að bjóða fólki að skoða.“

Eins verður opið hús hjá Basalt arkitektum, sem hafa hannað nokkur vinsæl baðlón. Þá taka fjölmargir fatahönnuðir þátt í ár og kynna nýjar línur.

„Það verður hægt að bóka sér kríu með dúnsængum eftir Studio Erindreka á Hótel holti. Það verður hægt að fara í sundlaugapartí með Salún í Vesturbæjarlaug, sjá sundbol kynntan með dansverki í Nauthólsvík. Svo eru nokkrir viðburðir þar sem hönnuðir og veitingastaðir vinna saman og bjóða upp á upplifanir. Til dæmis á Óx, Skreið og á Plöntunni í Norræna húsinu.“

Þá hvetur hún fjölskyldufólk til að gera sér ferð í Elliðaárstöð næsta sunnudag þar sem handhafar hönnunarverðlauna Íslands verða með viðburð. Líkt og áður segir hefst hátíðin næsta miðvikudag með Design Talks sem er alþjóðleg hönnunarráðstefna í Hörpu. Klara hvetur fólk til að sækja opnunina enda sé hún ekki einungis fyrir fagfólk heldur alla.

„Ég mæli með að tékka á Tix strax vegna þess að miðarnir fara mjög hratt á þetta.“

Allar upplýsingar um sýningar og viðburðina er að finna á heimasíðunni en frítt er inn á allar sýningar hátíðarinnar.