Mikil tímamót fyrir Víkinga, byrja á bílastæðum

Berghildur Erla Bernharðsdóttir skrifar 8. maí 2026 13:21

Haukur Hinriksson, framkvæmdastjóri Knattspyrnufélagsins Víkings fagnar nýjum samningi við Reykjavíkurborg sem felur í sér afnot af tíu þúsund fermetra lóð í Fossvogsdal og framtíðaruppbyggingu mannvirkja, m.a. knatthúss í Safamýri. Vísir

Framkvæmdastjóri knattspyrnufélagsins Víkings fagnar samningi við borgarráð um að félagið fái alls um tíu þúsund fermetra lóð sem Gróðrastöðin Mörk hefur haft afnot af í Fossvogsdal. Þá feli samningurinn í sér að borgin muni sjá um sjá um framtíðaruppbyggingu íþróttamannvirkja í Safamýri og við Traðarland. Fyrsta verkefnið verði bílastæði í Fossfogsdal.

Borgarráð samþykkti í gær að afhenda íþróttafélaginu Víkingi tíu þúsund fermetra lóð í Fossvogsdalnum sem Gróðrarstöðin Mörk hefur haft afnot af. Þá færðist eignarhald núverandi íþróttamannvirkja Víkings við Traðarland til Reykjavíkurborgar sem tekur þar með að sér viðhald og frekari uppbyggingu þar og í Safamýri.

Haukur Hinriksson framkvæmdastjóri Víkings fagnar því að málið sé loks til lykta leitt en hluti þess á rætur sínar að rekja til ársins 2008 þegar þáverandi borgarstjóri lofaði félaginu lóðinni í Fossvogsdal.

Þetta eru í fyrsta lagi mikil tímamót og mikil ánægja innan félagsins með þennan samning sem loksins náðist við Reykjavíkurborg í gær. Það sem var samþykkt í borgarráði í gær var samningur frá 2026 til 2035 sem felur m.a. í sér að borgin sér um framtíðaruppbyggingu á svæðum Víkings við Traðarland og Safamýri. Inni í samkomulaginu er stærsta atriðið knatthús sem borgin fyrirhugar að reisa í Safamýri.

Haukur segir að Víkingur afsali sér eignum á móti.

Á sama tíma og Reykjavíkurborg lofar þessari framtíðaruppbyggingu er Víkingur að gefa eftir eignarhald á mannvirkjum sínum sem eru metin á 2,5 milljarða króna,“ segir hann.

Haukur býst við að hægt verði að hefja framkvæmdir á bílastæði í Fossvogsdal strax á næsta ári á svokölluðu A- svæði sem nú er ræktunarreitur Gróðrarstöðvarinnar Markar.

Fyrirhugað er að byggja bílastæði og fl. á svæði A en þar verður byrjað að framkvæma samkvæmt samningnum við Reykjavíkurborg. Vísir

„Við búumst við að geta hafið framkvæmdir þar strax árið 2027,“ segir Haukur.

Deiliskipulag fyrirhugað á næstunni

Áður en kemur til breytinganna þarf að gera og samþykkja nýtt deiliskipulag fyrir svæðið. Haukur telur að það muni ekki dragast á langinn. Víkingur fær svo næsta reit, svokallaðan B- reit í Fossvogsdal, afhentan árið 2032.

„Á svæði B sjáum við fyrir okkur uppbyggingu á hverfastarfsemi félagsins, íþróttastarfsemi og jafnvel skólastarfsemi,“ segir hann.