Svara kallinu og hafa opið til tíu á kvöldin

Fréttir af lengri opnunartíma hafa vakið mikla athygli á tímum verðbólgu, áhyggjufullir neytendur ræða málið meðal annars á Facebook hópnum Verðlag - eftirlit og er því velt þar hvort opnunartíminn þýði hækkanir á verðlagi. Nokkrir fagna þó lengri opnunartíma en nú eru tvær Bónus verslanir, í Skipholti og á Laugavegi opnar til 22:00.

Erlendir ferðamenn sæki mikið í verslanirnar

Björgvin Víkingsson framkvæmdastjóri Bónus segir í svari við fyrirspurn Vísis að ákvörðunin um lengri opnunartíma í Skipholti hafi ráðist af því hve vel hafi tekist til á Laugavegi. Viðskiptavinir hafi kallað eftir lengri opnunartíma.

„En auk þeirra sækja erlendir ferðamenn mikið í verslun okkar þar sem og á Laugaveginum. Lengdur opnunartími á Laugaveginum hefur haft mjög jákvæð áhrif á verslunina og viðbrögð viðskiptavina, án þess að hafa neikvæð áhrif á vöruverð.“

Hann segir breytinguna ekki munu hafa neikvæð áhrif á verðlag í verslun. „Enda er það okkar helsta keppikefli að bjóða hagstæðasta mögulegt verð til okkar viðskiptavina í öllum okkar verslunum um allt land. Breytingar sem þessar eru gerðar til þess að koma enn betur til móts við þarfir allra okkar viðskiptavina með kostinum á að geta verslað lengur á hagstæðu verði.“