Dagur fékk háa sekt fyrir reiðilesturinn á EM

Dagur hélt einræða á blaðamannafundi fyrir undanúrslitaleik Króatíu og Þýskalands. Þar gagnrýndi hann skipulag mótsins og líkti leikmönnum Króatíu við „frosinn kjúkling í skyndibitakeðju EHF“.

Hann sagði Evrópumótið hafa sannað að evrópska sambandinu sé alveg sama um leikmennina og liðin sem keppa á mótinu.

Fyrir þessi ummæli fékk Dagur sekt upp á 4.000 evrur, sem jafngilda um 575 þúsund krónum. 

Helmingur þeirrar upphæðar er skilorðsbundinn til tveggja ára. Dagur þarf því að greiða 2.000 evrur strax, eða um 287 þúsund krónur, og aðra eins upphæð ef hann gerist brotlegur aftur.

Króatíska handknattleikssambandið fékk einnig sekt frá EHF, fyrir að brjóta reglur við verðlaunaafhendingu þegar Króatía tók við bronsverðlaunum eftir sigur gegn Íslandi.

Sambandið fékk 10.000 evra sekt fyrir að flagga óleyfilegum fána en 2.500 evrur eru skilorðsbundnar.

Ekki kemur fram hvaða fánalög Króatía braut en Sportske Novosti telur líklegast að fáninn vinstra megin á myndinni hér fyrir ofan hafi verið vandamálið. Á honum stendur „Ljubuški“ sem er bær í Hersegóvínu með sterk króatísk tengsl og sögu af átökum milli Bosníumanna og Króata í stríðinu undir lok síðustu aldar.

Sektunum er hægt að áfrýja á næstu sjö dögum.