Sund­laugar opnar til mið­nættis og ótak­mörkuð bíla­stæði

Fundur borgarstjórnar átti að hefjast klukkan tólf en fyrir lá að þar yrðu Hildur Björnsdóttir og Björg Magnúsdóttir valdar af kollegum sínum í embætti borgarstjóra og forseta borgarstjórnar. Fundurinn tafðist þó um nokkrar mínútur þar sem fráfarandi borgarstjóri var seinn á svæðið vegna viðtals sem hún var í.

Borgarfulltrúar kusu því næst borgarstjóra og forseta. Hildur og Björg fengu 12 atkvæði hvor í sitt embætti og skiluðu fulltrúar minnihlutans auðu.

Heiða heldur áfram í ráðhúsinu

Við lyklaskiptin færði Heiða Björg Hildi blómvönd og mynd af Vigdísi Finnbogadóttur. Hún er mikil fyrirmynd bæði Heiðu og Hildar. 

„Það var auðvitað heiður lífs míns að vera borgarstjóri. Það er búið að vera ótrúlega gaman og ég er stolt af þeim verkum sem við náðum að gera á þessum fimmtán mánuðum. En ég held mínum verkefnum áfram sem borgarfulltrúi. Það er af nægu að taka og margt sem er hægt að bæta í borginni okkar þannig ég hlakka til að takast á við það,“ segir Heiða og kveður niður orðróm um að hún ætli sér ekki að sitja sem borgarfulltrúi þetta kjörtímabilið. 

Hildur segir það sérstaka tilfinningu að vera orðin borgarstjóri.

„Þessu fylgir mikil ábyrgð. Ég finn fyrir því og mun gera mitt besta til að standa undir þeirri ábyrgð,“ segir Hildur. 

Fjöldi verkefna á fjórum árum

Meirihlutinn birti í dag 190 verkefna lista. Verkefnunum á ýmist að ljúka á hundrað dögum, tólf mánuðum eða fjórum árum. Meðal verkefna er að afnema reglur um hámarksfjölda bílastæða við nýbyggingar, fækka millistjórnendum hjá borginni, hafa sundlaugar opnar til miðnættis um helgar á sumrin, styðja við hinsegin fræðslu í grunnskólum, þrýsta á stjórnvöld um lagabreytingu svo fækka megi borgarfulltrúum og hefja framkvæmdir bæði á Sundabraut og mislægum gatnamótum við Reykjanesbraut og Bústaðarveg. Þá verði fitan skorin af innan veggja ráðhússins.

„Við ætlum okkur líka að yfirfara samþykkt um kjör og starfsaðstæður borgarfulltrúa. Það er margt sem má laga þar. Helsta fitulagið er auðvitað í stjórnkerfinu sjálfu. Borgarfulltrúarnir eru bara lítill hluti af því, þó að það sé margt sem má taka þar til. Helsta fitulagið er í stjórnkerfinu og það er þar sem við ætlum að taka til,“ segir Hildur.

Mannréttindaskrifstofa og -ráð hverfa

Samkvæmt heimildum fréttastofu stendur til að leggja niður bæði mannréttindaskrifstofu og mannréttindaráð borgarinnar. Hildur vildi ekki staðfesta þá ákvörðun.

„Hún mun liggja fyrir á næstu misserum. Við höfum auðvitað talað um stjórnkerfisbreytingar og að leggja niður skrifstofur. Þetta munum við allt kynna þegar það er klárt, vonandi á næstu vikum,“ segir Hildur.