Hand­tóku níu og nutu lið­sinnis sér­sveitar vegna staks egg­vopns

Mikill erill var hjá lögreglunni á Norðurlandi eystra síðastliðinn sólarhring en fjöldi fólks er á Akureyri þar sem bæjarhátíðin Ein með öllu fer fram um verslunarmannahelgina.

Vopnalagabrotið er til rannsóknar en samkvæmt upplýsingum frá varðstjóra á Akureyri var einungis um eitt eggvopn að ræða. Sérsveit ríkislögreglustjóra aðstoðaði lögreglu í aðgerðinni.

„Í aðgerðinni sjálfri eru níu alls handteknir. Einn af þeim er svo tekinn í frekari skoðun og endar á því að við þurfum að vista hann vegna málsins. Hinum átta var bara sleppt á staðnum,“ segir Andri Freyr Sveinsson varðstjóri. Enginn hinna handteknu sé undir lögaldri.

Þurft að tryggja aðstæður

„Við höfðum þarna vitneskju um að það væri hugsanlegt eggvopn í þessum hópi. Í gærkvöldi er gríðarlegur fjöldi fólks kominn saman á fjölskylduhátíð og þá voru aðstæður þannig að við ákváðum að fara í aðgerðir til að sannreyna þessar upplýsingar. Þessi rannsókn leiddi til þess að það fannst eggvopn á einum þeirra sem er svo handtekinn vegna málsins.“

„Þetta er bara þannig mál að við þurfum oft að tryggja aðstæður og þess vegna eru þessir átta aðrir handteknir,“ bætir Andri við. 

Lögreglan á Akureyri vinni náið með sérsveit ríkislögreglustjóra og menn á þeirra vegum hafi verið á vakt í gær. 

„Þeir eru með gríðarlega þekkingu á öllum svona vopnamálum og við nutum liðsinnis frá þeim sem er bara eðlilegt í svona málum. Þeir voru ekkert kallaðir neitt sérstaklega út, þeir eru þarna á vakt og koma með okkur í þetta mál.“

Líkamsárás á Akureyri en engin mál á Siglufirði

Ein stórfelld líkamsárás sem tilkynnt var undir morgun er til rannsóknar hjá lögregluembættinu. Enginn hefur verið handtekinn vegna hennar en brotaþoli var fluttur á sjúkrahús.

„Þar kom í ljós að hann var með beinbrot í andliti og var með höfuðáverka eftir slagsmál,“ segir Andri.

„Þegar lögreglan kemur á vettvang er gerandi farinn. Niðurstaðan var sú að við vorum ekki með upplýsingar um geranda þannig að það er eitthvað sem rannsóknardeild embættisins þarf að skoða.“

Tveir í fangageymslu vegna ölvunar á almannafæri

Þá komu upp átta mál hjá lögregluembættinu vegna ölvunar eða vímuástands síðastliðinn sólarhring og gistu tveir í fangageymslu vegna þessa.

Í fimm tilvikum voru afskipti höfð af börnum sem voru ekki talin vera í nógu góðu ástandi. Þau mál voru unnin í samráði við foreldra og barnavernd. 

Tíu umferðarlagabrot eru skráð hjá embættinu síðastliðinn sólarhring en ekkert tilfelli kom upp þar sem grunur var um akstur undir áhrifum vímugjafa.

Engin mál á Siglufirði

Engin mál eru skráð hjá lögreglunni á Siglufirði þar sem bæjarhátíðin Síldarævintýrið á Siglufirði fer fram. Alls voru skráð 83 mál hjá lögreglunni á Norðurlandi eystra síðastliðinn sólarhring.

„Við bættum í fjölda lögreglumanna fyrir þessa helgi. Ég vil meina að við hefðum lent í vandræðum ef við hefðum ekki verið jafn mörg og við vorum. Þetta eru bara alls konar mál sem komu upp sem má titla sem minniháttar en geta tekið alveg smá tíma að leysa úr,“ segir Andri Freyr Sveinsson, varðstjóri á Akureyri.

Fréttin hefur verið uppfærð.