Venni vann í Noregi en venst því ekki að vera Noregsmeistari

Vernharður Ravnaas, sem er oftast kallaður Venni, er fjórtán ára íslenskur GoKart-ökuþór sem hefur verið að gera það gott. Nú um helgina tók hann þátt í Noregsmeistaramótinu í junior-flokk í GoKart og sýndi mikla yfirburði.

Hann byrjaði helgina á því að vera hraðastur í tímatökunum sem gerði það að verkum að hann byrjaði fremstur í öllum keppnum. Hann vann allar keppnir sem hann tók þátt í og í úrslitakeppninni leiddi hann keppnina allan tímann og náði einnig að keyra hraðasta hring keppninnar.

Þrátt fyrir að hafa unnið Noregsmeistaramótið í GoKart fær hann ekki að vera Noregsmeistari. Hann keppir undir íslenska fánanum en ekki þeim norska en aðeins ökumenn sem keyra fyrir Noreg geta verið Noregsmeistarar. Vebjorn Glende endaði í öðru sæti mótsins og fær hann titilinn Noregsmeistari.

Þrátt fyrir að vera ekki formlega Noregsmeistari þá er þetta engu að síður frábært afrek fyrir unga ökuþórinn sem á greinilega framtíðina fyrir sér í öllum akstursíþróttum.