Frumkvöðlar hér heima heiðraðir

Aron Guðmundsson skrifar 7. september 2026 18:01

Fjölskylda, afkomendur og vinir Jóns S Halldórssonar við minningarskjöldinn sem var afhjúpaður honum itl heiðurs. Áletrunin á skildinum kemur frá fjölskyldu Jóns. Mynd: Bergur Bergsson

Á dögunum var haldinn viðburður þar sem að frumkvöðlar að byggingu RallyCross brautarinnar í Hafnarfirði voru heiðraðir. Þrjátíu og fimm ár eru liðin síðan hún var tekin í notkun. Við sama tilefni var afhjúpaður minningarskjöldur um Jón S. Halldórsson, goðsögn í íslensku mótorsporti, sem lést í umferðarslysi árið 1991.

Á upphafstímum RallyCross hér á landi hófu ungir menn og konur að aka gömlum bílum í ýmis konar malargryfjum. Einnig var búinn til hringur, afmarkaður með dekkjum og steinum, á stöðum á borð við Móa á Kjalarnesi, í Mosfellsbæ og á Kjóavöllum við Rjúpnahæð.

Er akstursíþróttin tók framförum og fór hópur manna af stað með þá hugmynd að byggja varanlega RallyCross braut. Eftir nokkra þrautargöngu fékkst að lokum leyfi fyrir braut hjá Hafnarfjarðarbæ.

Brautin er svo byggð í nafni RallýCross deildar Bifreiðaíþróttaklúbbs Reykjavíkur og að þessu stóðu að mestu aðilar og fyrirtæki þeirra sem lögðu til fjármagn, vélar, bifreiðar, búnað og mannskap. Halldór Gíslason, arkitekt og rallymaður hannaði brautina eftir að hafa skoðað nokkrar brautir erlendis.

„Í upphafði voru fremstir í flokki, ásamt Jóni S Halldórssyni, þeir Einar Gíslason frá ET dráttarbílum, Birgir Vagnsson frá Hjólbarðahöllinni, Ólafur Sigurjónsson frá Bílbót í Keflavík, Guðbergur Guðbergsson og Karl Gunnlaugsson heitinn sem afsalaði sér síðar hlut sínum til Einars,“ segir í tilkynningu frá skipuleggjendum viðburðarins. „Að sjálfsögðu voru miklu fleiri aðilar sem komu að þessu með einum eða öðrum hætti, vinir og vandamenn þessara aðila, keppendur og aðrir sjálfboðaliðar. Allir þessir aðilar eiga miklar þakkir skildar fyrir þetta mikla framtak.“

Ofantaldir menn voru gerðir að heiðursfélögum í Akstursíþróttafélagi Hafnarfjarðar en sá klúbbur á brautina í dag. Klúbburinn hefur haldið úti mjög öflugu starfi.

Á sama viðburði var afhjúpaður skjöldur til minningar um Jón S. Halldórsson sem var sjálfur mikill frumkvöðull í íslensku mótorsporti.

Páll H. Halldórsson, goðsögn í íslensku mótorsporti og Ólafur Guðmundsson, margreyndur ökuþór og dómari í mótorsporti, við minningarskjöldinn um Jón S. HalldórssonMynd: Bergur Bergsson

Jón lét lífið í umferðaslysi þann 17 apríl 1991 og náði því ekki að aka þessa braut en einn af draumum hans var að koma upp góðu svæði, þar sem ökumenn ungir sem aldnir gætu komið og æft sig, í samvinnu við tryggingarfélögin og um leið skilað betri ökumönnum út í umferðina.

Akstursíþróttir

Mest lesið

Fleiri fréttir