Bað Trump um „vetrarpakka“

Forsetarnir funduðu á hliðarlínunum á allsherjarþingi Sameinuðu þjóðanna i New York í gærkvöldi og í kjölfarið ræddi Selenskí við blaðamann Wall Street Journal. Þá sagðist Selenskí hafa beðið um pakka af vopnum fyrir veturinn.

Hann sagðist einnig meðvitaður um að orkumálin væru í forgangi hjá Trump.

„Ég held að hann muni reyna að semja um orkuvopnahlé,“ sagði Selenskí. Hann bætti við að hann teldi Vladimír Pútín, forseta Rússlands, ólíklegan til að semja um vopnahlé varðandi orkuinnviði, án frekari þrýstings eins og hertra refsiaðgerða.

Sjá einnig: Í­huga að fara nýja leið og bjóða Rússum við­skipta­samninga

Selenskí telur að Pútín sjái sig í ágætri stöðu eftir kosningarnar í Rússlandi og hann sjái sig ekki knúinn til að breyta til í hernaði sínum, þrátt fyrir takmarkaðan árangur á víglínunni.

Trump sagði á blaðamannafundi með Selenskí að hann væri vongóður um að hægt yrði að binda enda á stríðið. Eftir fund þeirra sagðist Selenskí svo vonast til þess að Trump gæti fengið Pútín á fund með þeim tveimur.

Trump hefur beðið Selenskí um að hætta árásum á olíuvinnslur í Rússlandi, vegna þess hve hátt verð á díselolíu er. Trump hefur haldið því fram að það sé vegna árása Úkraínumanna en ekki vegna stríðs Bandaríkjanna gegn Íran og meðfylgjandi takmarkana á flutningi olíuafurða frá Mið-Austurlöndum.

Sjá einnig: Bað Selenskí um að stöðva árásir á rússneskar olíuvinnslur

Selenskí sagði í viðtalinu að Úkraínumenn hefðu eyðilagt um 45 prósent af getu Rússa til að vinna olíu. Rússar eru einn stærsti díselolíuframleiðandi heims en hafa stöðvað útflutning vegna árása Úkraínumanna.

Hann sagði að árásir Úkraínumanna væru svar við árásum Rússa á borgaralega orkuinnviði í Úkraínu. Sala olíuafurða er þar að auki langstærsta tekjulind rússneska ríkisins.

„Líf okkar eru mikilvægari en orkuverð.“

Á blaðamannafundi eftir fund forsetanna sagði Trump að hann væri að íhuga að banna útflutning díselolíu frá Bandaríkjunum, til að reyna að lækka verðið þar í landi.

Í færslu sem Selenskí skrifaði eftir fund hans og Trumps sagði hann að þeir hefðu rætt um leiðir til að binda enda á stríðið. Það væri í algjörum forgangi en hann væri ekki viss um að Rússar hefðu áhuga á friði að svo stöddu.

Þá lagði Selenskí aftur fram orkuvopnahlé og sagði að ef Rússar myndu hætta árásum á orkuver, dreifikerfi og hita- og vatnsveitur í Úkraínu fyrir veturinn, myndu Úkraínumenn hætta árásum á olíuvinnsluinnviði og önnur orkutengd skotmörk í Rússlandi.

Selenskí vísaði einnig til þess að Trump myndi í dag hitta Xi Jinping, forseta Kína. Hann sagði Trump að hægt væri að hafa áhrif á Pútín í gegnum Xi en Úkraínumenn segja Kínverja hafa gert Rússum kleift að halda stríðsrekstrinum áfram með því að selja þeim íhluti fyrir hergagnaframleiðslu, kaupa af þeim olíuafurðir og öðrum leiðum.