Slakur fyrri hálf­leikur varð Val að falli

Slóvensku meistararnir tóku á móti Val í Evrópudeildinni í dag og náði lið Vals að komast í 2-0 en það endaði á að vera eina skiptið sem Valur var yfir í leiknum. Heimamenn í Slovan voru fljótir að jafna og litu aldrei til baka.

Slovan náði jafnt og þétt að byggja upp gott forskot og var liðið með átta marka forskot í hálfleik, 20-12. Þegar leið á seinni hálfleikinn náði Valur að minnka forskot heimaliðsins en forskotið var því miður of stórt fyrir íslenska liðið og endaði leikurinn með 34-29 tapi.

Gunnar Róbertsson heldur áfram að vera markahæsti leikmaður Vals og skoraði átta mörk og Bjarni í Selvindi var stuttu á eftir honum með sex mörk.

Valur er því í öðru sæti riðilsins með tvö stig og trónir Slovan á toppi riðilsins með fullt hús stiga.

Jafn Íslendingaslagur

Í Evrópudeildinni var Íslendingaslagur þar sem Bergischer, sem Arnór Þór Gunnarsson þjálfar, tók á móti IK Savehof, þar sem Birgir Steinn Jónsson spilar. Bergischer náði að vinna góðan sigur í annars jöfnum leik, 28-25.

Birgir Steinn spilaði fínan leik og skoraði þrjú mörk en Jesper Roisland, liðsfélagi Birgis, var í hörkuformi og skoraði sjö mörk. Lærisveinar Arnórs Þórs voru duglegir að dreifa mörkunum en Fynn Hangstein var markahæstur með sjö mörk og Janik Schrader og Sören Steinhaus voru stutt á eftir honum með sex mörk ásamt Tom Bergner.

Óðinn að raða inn mörkum

Óðinn Ríkharðsson og félagar í Kadetten Schaffhausen unnu stórsigur á HC Izvidac í Evrópudeildinni. Leikurinn endaði með 14 marka sigri og endaði hann 41-27.

Óðinn átti stórleik og skoraði níu mörk úr tíu skotum ásamt liðsfélaga sínum Luka Maros. Lið hans er því á toppi C-riðils með fullt hús stiga og virðist félagið vera í góðri stöðu í Evrópudeildinni.