Þórður ætlar sér í landsliðið á ný

Með tilkomu nýs þjálfara hjá Stoke City, Johan Boskamp, hefur Þórður Guðjónsson fengið fleiri tækifæri með liðinu, en hann var ekki í náðinni hjá forvera Boskamp,Tony Pulis. Þórður er ánægður með nýja þjálfarann, en hann var við stjórnvölinn hjá Genk í Belgíu þegar Þórður lék þar við góðan orðstír. "Ég er ánægður með að hingað sé kominn nýr þjálfari. Síðasta tímabil var mikil vonbrigði fyrir mig, þar sem ég fékk ekkert að spila hjá félaginu. Núna held ég að sé annað upp á teningnum. Ég hef verið að spila í æfingaleikjunum að undanförnu og það hefur gengið vel. Það er allt annað andrúmsloft hjá félaginu núna heldur en var þegar ég kom til félagsins. Mér fannst ég þurfa að líða fyrir það að vera Íslendingur í fyrra, vegna þess að það eru Íslendingar sem eru í stjórn félagsins. Ég finn ekki fyrir þessu núna og er ánægður hérna." Sem leikmaður íslenska landsliðsins hefur Þórður yfirleitt staðið fyrir sínu. "Ég er nokkuð ánægður með það hvernig ég hef leikið með landsliðinu. Ég er stoltur að því að leika fyrir Íslands hönd og hef aldrei átt í neinum vandræðum með að einbeita mér í leikjum landsliðsins, því það er ekkert skemmtilegra og betra en að spila fyrir það. Ég ætla mér að vinna mér sæti í liðinu aftur og vonandi dugar frammistaða mín í vetur með Stoke City til þess að komast í hópinn á nýjan leik." Fjölskylda Þórðar hefur komið sér ágætlega fyrir í nágrenni við æfingasvæði Stoke og segir ekki yfir neinu að kvarta. "Það hefur farið ágætlega um okkur hérna alveg síðan við komum hingað, en það er alltaf leiðinlegt þegar manni líður illa í vinnunni, eins og mér leið í fyrra. Núna er allt í góðu í fótboltanum og ekkert því til fyrirstöðu að það sé ánægjulegur tími framundan."