Ótrúlegt að ekki fór verr

Flutningabíll frá Hringrás með brotajárnsfarm lenti út af vegi efst á Bessastaðafjalli í Fljótsdal um miðjan dag í gær. Bremsubúnaður í bílnum gaf sig með þeim afleiðingum að hann rann út af í beygju og flaug 26 metra út fyrir veg. Slysið átti sér stað í efstu beygju á Bessastaðafjalli.

Bílstjórinn, sem er pólskur, var einn í bílnum þegar slysið varð. Mikil mildi þykir að hann skyldi komast lífs af, en beita þurfti klippum til að ná honum út úr bílnum, sem er gjörónýtur. Lögreglumaður á Egilsstöðum sagði ótrúlegt að ekki skyldi fara verr og að engu væri líkara en að bílstjórinn hefði níu líf.