Eina akrein í hvora átt

Aðeins önnur brúin af tveimur á mislægum gatnamótum Vesturlandsvegar og Suðurlandsvegar fyrir neðan Grafarholtið verður byggð að þessu sinni. Sú síðari er ekki komin á vegaáætlun stjórnvalda.

Jóhann Bergmann, deildarstjóri nýframkvæmda á suðvestursvæði hjá Vegagerðinni, segir að á brúnni sem í byggingu er núna verði ein akrein í hvora átt. Gert er ráð fyrir að hægt verði að breikka hana síðar gerist þess þörf.

Gatnamótin mislægu hafa verið í byggingu frá því í maí. Þau eiga að verða fullgerð 1. nóvember næstkomandi.