Fundað aftur í mánuðinum

Áfram var fundað um varnarmál Íslands í Washington í gær. Fjögurra tíma fundi viðræðunefndanna lauk um klukkan eitt að staðartíma, en að sögn Ragnheiðar Elínar Árnadóttur, aðstoðarmanns forsætisráðherra, fékkst ekki niðurstaða á fundinum.

„Málin voru öll ítarlega rædd, bæði hvað varðar brottflutning varnarliðsins og hvað varðar öryggis- og varnarmálin. Það er ekki komin endanleg niðurstaða í málið en það hefur verið ákveðið að halda annan fund í Reykjavík núna síðar í mánuðinum. Sú dagsetning hefur ekki verið ákveðin,“ sagði Ragnheiður.