Hópslagsmál á Selfossi

Tveir menn liggja á sjúkrahúsi og fimm gista fangageymslur lögreglunnar á Selfossi eftir heiftarleg hópslagsmál, sem brutust út fyrir utan heimili þeirra slösuðu í nótt, þar sem meðal annars var beitt keðjum og bareflum.

Fyrr um kvöldið hafði lögregla stillt til friðar með mönnunum fyrir utan veitingahús í bænum. Árásarmennirnir voru á bak og burt þegar lögregla kom á vettvang og kallaði þegar á sjúkrabíla, sem fluttu hina slösuðu á sjúkrahúsið á Selfossi og Slysadeild Landsspítalans, þar sem þeir dvelja enn. Hinir fimm voru handteknir þegar þeir leituðu sér læknisaðstoðar á heilsugæslustöðinni á Selfossi, eftir átökin. Málsatvik eru óljós, en yfirheyrslur ættu að skýra þau betur í dag.