Íslendingur í dómsmáli í Færeyjum kann best við sig þar í landi

Íslendingurinn sem nú er fyrir rétti í Færeyjum vegna meintra tengsla hans við Pólstjörnumálið hefur mætti töluverðri mótstöðu í lífinu og kann best við sig í Færeyjum. Frá þessu er greint á vef færeyska blaðsins Dimmalættings í dag.

Farið var yfir lífshlauð Birgis Marteinssonar fyrir réttinum í gærdag en hann er ákærður fyrir að hafa tekið á móti og haft í sinni vörslu efnin sem haldlögð voru í málinu, um 24 kíló af amfetamíni, nærri 15 kíló af e-pilludufti og um 1800 e-pillur. Af þessu urðu samanlagt nærri tvö kíló af amfetamíni og e-pilludufti eftir í fórum hans. Saksóknari í Færeyjum hefur farið fram á tíu ára fangelsi yfir honum.

Fram kom við réttarhöldin að Birgir, sem er vinur Guðbjarna Traustasonar sem dæmdur var í málinu hér heima, hefði alist upp hjá ömmu sinni og afa þar sem foreldrar hans voru mjög ungir þegar þeir eignuðust hann. Þá hafi hann kynnst Guðbjarna, eða Badda, eins og hann er nefndur í frétt Dimmalættings. Afi hans mun hafa drukknað þegar Birgir var tólf ára gamall og flutti hann þá til móður sinnar og manni sem hún hafði gifst. Fram kom að Guðbjarni hefði verið hans besti vinur í æsku.

Enn fremur kom fram við réttarhöldin að Birgir hefði af og til búið og starfað í Færeyjum en faðir hans er hálfu Færeyingur. Hann hefði komið til Færeyja í apríl í fyrra og unnið við ýmislegt en hann hafði verið í nýrri vinnu í um þrjá daga þegar hann var handtekinn í haust í tengslum við Pólstjörnumálið. Mennirnir sem dæmdir voru fyrir aðild að málinu hér á landi segja Birgi saklausan og að hann hafi aldrei átt að koma nálægt þessu máli.

Fram kom í máli Birgis að honum hefði liðið mjög vel í Færeyjum og ef fjölskylda hans væri ekki á Íslandi hefði hann valið Færeyjar sem sitt heimaland.