Dramatískur sigur Þórsara

Orri Sigurjónsson reyndist hetja Þórsara í hádramatískum leik gegn Fram í fyrstu deild karla í knattspyrnu, en fimm mörk litu dagsins ljós í leiknum.

Jóhann Helgi Hannesson kom Þórsurum í 2-0 með tveimur mörkum í fyrri hálfleik, en annað þeirra var af vítapunktinum.

Sigurður Gísli Snorrason minnkaði muninn fyrir Fram með marki í sínum fyrsta leik fyrir félagið á 61. mínútu og annar nýliði, Atli Fannar Jónsson, jafnaði metin á 78. mínútu.

Sigurmarkið kom svo í uppbótartíma, en það skoraði Orri Sigurjónsson með skalla eftir hornspyrnu.

Þór skýst upp í fjórða sæti deildarinnar með sigrinum, en þeir eru með 24 stig, jafnmörg og Fjarðabyggð sem er í öðru sætinu. Fram er í tíunda sætinu með tólf stig.