Þögn sló á bakarísgesti þegar forseti Íslands keypti sér bollur

Forseti Íslands, Ólafur Ragnar Grímsson, vill sínar bollur á Bolludaginn líkt og aðrir Íslendingar. Hann tók jafnvel forskot á sæluna í gær líkt og svo margir en hann skellti sér í bollukaup upp úr hádegi.

Svartri Lexus-bifreið forsetans var lagt við verslun Bakarameistarans í Suðurveri á öðrum tímanum í gær. Atli Freyr Steinþórsson, útvarpsmaður á Rás 1, var á meðal viðstaddra og deildi upplifun sinni með Facebook-notendum í gær.

Frásögn Atla Freys hefur vakið mikla athygli og fengið mikið hrós enda sérstaklega lýsandi og skemmtileg.

„Út gengur hægum skrefum forseti Íslands, Ólafur Ragnar Grímsson, íklæddur bláköflóttri lumberjack-skyrtu, dökkfjólubláum rússkinsbuxum og svartri 66° norður-úlpu með hettu. Hann sækir númeraðan miða af rauða miðahjólinu við innganginn, tekur sér stöðu í þvögu annarra viðskiptavina og bíður þess að röðin komi að honum. Allir sem þarna eru staddir reyna af alefli að horfa ekki á hann eða láta á því bera að þeir þrái að virða hann fyrir sér vel og lengi, þar sem hann er staddur í þessum aðstæðum, inni í bakaríi á sunnudegi fyrir bolludag,“ segir í frásögn Atla Freys.

Svo kom röðin að Ólafi Ragnari sem spurði afgreiðsludömuna út í bollurnar sem voru til sölu.

„Dökkhærður fjölskyldufaðir yfir meðalþyngd sem situr lengst úti í horni springur á limminu. Hann tekur upp símann og smellir af mynd. Rauðhærð kona um þrítugt á næsta borði sem er einnig að laumu-ekkihorfa á Ólaf rennir augunum að fjölskylduföðurnum án þess að breyta höfuðstöðu sinni. Hún horfir á mig. Er leyfilegt að taka myndir við þessar aðstæður? Er bílstjóri Ólafs, sem gengur í hringi framan við Lexus-bifreiðina úti, vopnaður?“

Ólafur Ragnar greiddi fyrir vörurnar með debetkorti og hélt út með brúnan bakaríspoka og hvítan kassa af bollum.

„Ólafur hefur úlpuermarnar fram á fingurna því það er kalt. Bílstjórinn Quasimodo-hleypur á móti honum, opnar skottið, tekur við bollukassanum lotinn í baki, leggur hann ofur varlega ofan í og hagræðir. Hann opnar fyrir Ólafi, vísar honum til sætis aftur í og þeir aka á braut. Þögn er í bakaríinu. Dökkhærð kona um fertugt bendir á eftir bílnum út um rúðuna og segir móðurlega við stúlku í bleikum Hello Kitty-stígvélum: Sandra Sif, sástu hvernig númeraplatan var á þessum bíl? Sandra Sif segir: Já, mamma.“

Frásögn Atla Freys af bolluævintýrum forsetans hefur eðlilega vakið mikla athygli og má lesa frásögnina í heild hér að neðan.