Hagi stofnaði félag og gerði það að meisturum á átta árum

Rúmenska goðsögnin Gheorghe Hagi stofnaði nýtt knattspyrnufélag í heimalandinu fyrir átta árum síðar og í dag er það rúmenskur meistari. Ótrúlegt.

Félagið heitir Viitorul og fagnaði titlinum með látum um nýliðna helgi eftir 1-0 sigur á FC Cluj.

Ekki er þó víst að Viitorul muni halda titlinum því FCSB, sem áður var þekkt sem Steaua Búkarest, hefur ákveðið að kæra til íþróttadómstólsins í Sviss.

Bæði lið fengu 44 stig en Knattspyrnusamband Rúmeníu úrskurðaði að Viitorul væri meistari þar sem liðið væri með betri innbyrðisárangur gegn FCSB í úrslitakeppninni.

Það sættir FCSB sig illa við. Liðið var með betri innbyrðisárangur í deildarkeppninni og það eigi að gilda.

„Það er alveg 100 prósent. Við förum með þetta í íþróttadómstólinn sem mun svo afhenda okkur bikarinn,“ sagði Gigi Becali, forseti FCSB.

Titillinn um helgina var sérstaklega sætur fyrir Hagi sem fór í fússi frá Steaua á sínum tíma og stofnaði sitt eigið félag í kjölfarið. Hann segir forráðamenn FCSB vera tapsára.

„Þó svo þeir séu í fýlu þá erum við hamingjusamir. Þeir verða að haga sér eins og fullorðnir menn. Verða að kunna að tapa,“ sagði Hagi.

Það sem gerir árangur félags Hagi enn magnaðri en ella er sú staðreynd að leikmennirnir koma úr unglingastarfi Viitorul og aðeins einn útlendingur er á mála hjá félaginu.

„Ég er ótrúlega stoltur af þessu afreki. Að þetta séu leikmenn úr akademíunni okkar og ungir Rúmenar. Þeir gáfu allt og afrekuðu hið ótrúlega. Við erum yngstu meistarar Evrópu. Ég gerði greinilega réttan hlut er ég ákvað að fara í þetta verkefni.