Segir RÚV maka skít íhaldsins á alla

Atli Þór Fanndal blaðamaður, en hann hefur numið blaðamennsku í Skotlandi undanfarin ár og látið til sín taka í fjölmiðlum sem rannsóknarblaðamaður, sparar sig hvergi þegar hann lýsir þeirri umræðu sem boðið er uppá í Ríkisútvarpinu.

„Hlutleysi Rúv snýst auðvitað ekki um annað en að maka skít íhaldsins á alla. Ótrúleg lágkúra þessi umræða þarna,“ segir Atli Þór Fanndal.

Sjónvarpsmaðurinn Helgi Seljan, sem ávallt er tilbúinn að rísa upp til varnar stofnun sinni beri svo undir, vill ekki sitja þegjandi undir slíkri einkunn. Hann svarar Atla Þór og það er sem kuli af orðum hans, slík er írónían og sárindin. „Hlustið á Atla. Hann er eini blaðamaðurinn í þessu landi sem eitthvað kann veit og getur.“

Helga Vala vænd um popúlisma

Tilefni þessara orðahnippinga er umræða sem Helga Vala Helgadóttir alþingismaður efnir til á Facebooksíðu sinni. Helga Vala var ekki kát með rabb um tíðindi af þingi sem Ríkisútvarpið bauð uppá í morgun. Við hljóðnemann sátu þeir Óðinn Jónsson og Björn Þór Sigbjörnsson sem ekki leituðu langt yfir skammt; Jóhanna Vigdís Hjaltadóttir fréttaþulur og þingfréttaritari Ríkissjónvarpsins var sérstakur gestur þeirra. Hún lýsti umræðu um akstursgreiðslur og aðrar sporslur þingmanna með þeim hætti að Helgu Völu ofbauð.

„Ég kom þar upp og skoraði á forseta þings að svara einfaldlega spurningum fjölmiðla án frekari dráttar. Var ég vænd um það, af Jóni Gunnarssyni, að vera popúlisti og tók þingfréttaritarinn að hluta undir það „enda væri verið að ræða þetta í forsætisnefnd, meðal annars með þingflokksformönnum á miðvikudag“ eða tveimur dögum eftir téða umræðu,“ segir Helga Vala og rekur spjall þeirra þremenninga.

Þurfti að kreista upplýsingarnar fram

„Jóhanna spurði af hverju þingmenn hefðu ekki kallað eftir þessum upplýsingum fyrr. Jóhanna spurði sig hvers vegna svo væri, eftir að hafa rétt áður í raun tekið undir hneykslan Jóns Gunnars á því að það væri verið að kalla eftir því að þingið svari endurteknum spurningum fjölmiðla.“

Þetta segir Helga Vala, sem á árunum 2002 til 2005 starfaði á fréttastofu RÚV og sem dagskrárgerðarmaður þar á Ríkisútvarpinu, með hinum mestu ólíkindum. Fyrir liggi upplýsingar um þann sem ók mest og þann sem ók næst mest.

„Ekki af því að þingið svaraði heldur af því að ýmist svöruðu þingmenn sjálfir eða það kvisaðist út um hvern var rætt. Við vitum ekki hver var númer 3, 4 og 5. Við vitum enn ekki hvort SDG fær húsnæðisstyrk, en hann hefur fullyrt í fjölmiðlum að svo sé ekki. Þess ber að geta að á þessum tímapunkti var um það rætt að birta upplýsingar um greiðslur til þingmanna framkvæmdar frá 1. Jan 2018.“

Furða sig á afstöðu Jóhönnu Vigdísar

Helga Vala furðar sig mjög á afstöðu sem hún telur sig greina í orðum Jóhönnu Vigdísar:

Er þingfréttaritarinn í alvöru að kalla eftir að við þingmenn eigum einir að fá aðgang að þessum sjálfsögðu upplýsingum? Er ekki eðlilegt að fjölmiðlum sé bara svarað?

„Þetta eru ekki leyndar greiðslur heldur bara allt klárt í bókhaldi og ætti því að vera sáraeinfald að veita þessar upplýsingar.“

Orð þingmannsins falla í kramið meðal vina hennar á Facebook, ýmsir eru á því að Jóhanna Vigdís sé helst til hliðholl Sjálfstæðisflokknum. Meðal þeirra sem taka undir gagnrýni Helgu Völu þá er snýr að nálgun Jóhönnu Vigdísar er útgefandinn Kristján B. Jónasson sem segir: „Að hlusta á blaðamann fara með þessa þulu var ... sérstakt.“