Steve Bruce náði loks í sigur gegn United

Steve Bruce náði loksins að hafa betur gegn sínu gamla félagi Manchester United, í sínum 400. leik sem knattspyrnustjóri.

Eftir 22 tilraunir án þess að ná að stýra liði til sigurs gegn Manchester United kom sigurinn loksins í dag þegar Newcastle vann Manchester United 1-0 á heimavelli sínum í dag.

Eina mark leiksins skoraði hinn 19 ára Matthew Longstaff, í sínum fyrsta leik í ensku úrvalsdeildinni. Matthew er yngri bróðir Sean Longstaff sem var sterklega orðaður við Manchester United í sumar.

Vandræði Ole Gunnar Solskjær halda áfram, en lið United gerði sig ekki sérlega líklegt til þess að taka sigurinn á St. James's Park og áttu gestirnir aðeins þrjú skot á markrammann.

Manchester United hefur nú ekki unnið í síðustu 11 útileikjum og situr liðið í 12. sæti ensku úrvalsdeildarinnar með 9 stig. Newcastle komst upp úr fallsæti, er í 16. sæti með 8 stig.