SAS stöðvar ferðir til Kína

Norræna flugfélagið SAS hefur ákveðið að aflýsa öllum flugferðum félagsins til og frá Kína fram til 9. febrúar hið minnsta. Er þetta gert vegna útbreiðslu Wuhan-kórónaveirunnar.

DR segir frá því að ferðum SAS til og frá kínversku borganna Sjanghæ og Peking verði aflýst, dagana 31. janúar til 9. febrúar. Verði svo síðar tekin ákvörðun hvort að tímabilið verði framlengt.

SAS hefur flogið til og frá borgunum sex sinnum í viku. „Við fljúgum þangað í kvöld og heim í fyrramálið, en eftir það verður lokað á allar ferðir,“ segir Kristian de Place Gamborg Hansen, starfandi upplýsingafulltrúi félagsins. Þá verður sala á miðum SAS til stórborganna tveggja stöðvuð til loka febrúarmánaðar.

SAS hyggst aðstoða þá viðskiptavini sem eiga miða til Peking og Sjanghæ á tímabilinu sem um ræðir við að komast á áfangastað með öðrum leiðum.

Norræna flugfélagið mun áfram fljúga til og frá Hong Kong, en yfirvöld þar hafa lokað á lestar- og ferjusamgöngur milli Hong Kong og meginlands Kína.

Með ákvörðun sinni hefur SAS bæst í hóp röð flugfélaga sem hafa stöðvað ferðir til Kína, en áður hafa British Airways, KLM, Swiss Airlines, Austria Airways, Canada Airlines og Lufthansa gert slíkt hið sama.