Opið bréf til KSÍ!

Kæra stjórn KSÍ,

þann 30. júní s.l. sendum við hjá BDS Ísland ykkur bréf vegna samnings ykkar við íþróttavöruframleiðandann Puma sem tók gildi 1. júlí s.l. Okkur tókst ekki að ná eyrum ykkar með því bréfi og reynum því aftur – nú með opnu bréfi.

Áður en lengra er haldið er mikilvægt að það komi fram að BDS er alþjóðleg hreyfing sem fór af stað árið 2005 með ákalli frá palestínsku þjóðinni. BDS stendur fyrir Boycott, Divestment and Sanctions en hreyfingin hvetur til sniðgöngu, efnahagsþvingana og afturköllunar fjárfestinga í Ísrael þar til stjórnvöld fylgja alþjóðalögum og virða mannréttindi Palestínumanna. Hreyfingin er fram komin af frumkvæði palestínsku þjóðarinnar og er stýrt af Palestínumönnum sjálfum. Að kalla eftir sniðgöngu gegn ísraelskum stjórnvöldum er sú aðferð sem Palestínumenn hafa óskað eftir að alþjóðasamfélagið styðji og hún er friðsamleg.

KSÍ telur um 10% þjóðarinnar og er því stærsta og öflugasta félagasamband íþróttafélaga á Íslandi. Félagið hefur hingað til nýtt sér stöðu sína til þess að taka virkan þátt í samfélagslegum verkefnum og vinna samkvæmt jafnréttisstefnu. Vitandi það þykir okkur mikilvægt að segja ykkur frá tengslum Puma við brot á alþjóðalögum og mannréttindum og stuðningi þeirra við hernám, landtökubyggðir, þjóðernishreinsanir og aðskilnaðarstefnu ísraelskra stjórnvalda, ef ykkur er ekki kunngert um þau nú þegar.

Puma er eini alþjóðlegi styrktaraðili Knattspyrnusambands Ísraels (IFA) sem samanstendur m.a. af knattspyrnuliðum frá ólöglegum ísraelskum landtökubyggðum á palestínskum landsvæðum. MannréttindasamtökinHuman Rights Watch hafa fjallað um þetta á yfirgripsmikinn hátt. Delta – sem er með einkaumboð fyrir Puma í Ísrael – var auk þess nýlega sett álista Sameinuðu þjóðanna yfir fyrirtæki sem hagnast á viðskiptum í ólöglegum landtökubyggðum.

Landtökubyggðir eru hluti af stefnu Ísraelsríkis um yfirtöku á palestínskum landsvæðum og skipa stóran sess í ólöglegu hernámi þess yfir Palestínu. Þessi landtökustefna hrekur innfæddar palestínskar fjölskyldur af heimilum sínum og rekur þær á flótta, rænir frá þeim náttúruauðlindum og hindrar ferðafrelsi þeirra. Jafnframt hindrar hún uppbyggingu palestínskrar íþróttastarfsemi og hamlar þátttöku og starfsferil palestínsks íþróttafólks. Landtökubyggðir hindra einnig aðgang Palestínumanna að hreinu vatni, rafmagni og heilbrigðisþjónustu, sem gerir palestínskar fjölskyldur enn berskjaldaðri á tímum heimsfaraldurs.

Árið 2016 ítrekaði Öryggisráð Sameinuðu þjóðanna með ályktun 2334 að ísraelskar landtökubyggðir væru ólöglegar og fordæmdi þær sem svívirðilegt brot (e. “flagrant violations”) á alþjóðalögum. Ísraelskar landtökubyggðir flokkast enn fremur undir stríðsglæpi samkvæmt alþjóðalögum. IFA hefur neitað að grípa til aðgerða til þess að enda hlutdeild sína í þessum glæpum, þrátt fyrir að tengslin hafi endurtekið verið fordæmd, meðal annars af ráðgjöfum Sameinuðu þjóðanna,mannréttindasamtökum og fulltrúum Evrópuþingsins.

Árið 2018 sendu meira en tvö hundruð palestínsk íþróttalið ákall til Puma þar sem fyrirtækið var beðið um að binda enda á stuðning sinn við hernámið með því að rjúfa styrktarsamninginn við IFA. Puma svaraði erindinu ekki efnislega, heldur sagði palestínsku liðunum eingöngu að Puma styddi „jafnrétti á heimsvísu“. Sjálfsmat Puma, í skýrslu frá árinu 2016, tilgreindi styrktarsamninga (e. sponsorship activities) sem einn af veiku blettum fyrirtækisins í tengslum við mannréttindi.

Puma, sem einn stærsti og öflugasti íþróttavöruframleiðandi heims, veitir glæpum IFA lögmæti með styrktarsamningnum – og er því samsekt. Þessi tengsl aðstoða IFA við að halda hlutdeild sinni í brotum á alþjóðalögum og mannréttindum úr sviðsljósinu og af knattspyrnuvellinum. Orðspor Puma hefur beðið hnekki vegna styrktarsamningsins við IFA og á sama tíma hafa spurningar vaknað um það góða starf sem Puma hefur unnið í þágu jafnréttis.

Málið snýst ekki um að hér sé verið að blanda saman „íþróttum og stjórnmálum“ eða skoðanaskipti sem við getum verið sammála eða ósammála um. Ísraelsríki hefur brotið fleiri samþykktir Sameinuðu þjóðanna en nokkuð annað ríki í heiminum og verið fordæmt oftar en nokkuð annað ríki. Neitunarvald Bandaríkjanna í Öryggisráði Sameinuðu þjóðanna hefur ítrekað verndað Ísraelsríki gegn öllum tilraunum til að neyða Ísrael að fara eftir alþjóðalögum og virða mannréttindi. Það er einfaldlega staðreynd að í áratugi hafa ísraelsk stjórnvöld neitað Palestínumönnum um grundvallarréttindi þeirra, frelsi, jafnrétti og sjálfsákvörðunarrétt, með þjóðernishreinsunum, aðskilnaðarstefnu, landnámi og hernámi og alþjóðasamfélagið hefur alltof lengi brugðist palestínsku þjóðinni.

Ísraelskar mennta- og menningarstofnanir, sem og íþróttahreyfingar, taka beinan þátt í að viðhalda, verja og hvítþvo kúgun ísraelskra stjórnvalda á Palestínumönnum. Í gegnum listir, menningu og íþróttir reyna ísraelsk stjórnvöld gagngert að fegra ímynd sín á alþjóðavettvangi á meðan brotið er á mannréttindum palestínsku þjóðarinnar á bak við tjöldin. Þess vegna hefur verið kallað eftir sniðgöngu á því sviði eins og öðrum og sífellt stærri hópur listafólks neitar að koma fram eða sýna list sína í Ísrael.

Sem aðdáendur KSÍ höfum við áhyggjur af því að orðspor félagsins verði flekkað samhliða því sem alþjóðlega herferðin gegn Puma heldur áfram að stækka. Puma hefurdjúpstæðar áhyggjur af herferðinni og þeirri neikvæðu athygli sem hún hefur í för með sér. Herferðin hefur meðal annars haft þau áhrif að Liverpool ákvað nýlega að endurnýja ekki samning sinn við Puma. Þá ákvað Luton Town FC á dögunum að endurnýja ekki samning sinn við Puma vegna stuðnings framleiðandans við mannréttindabrot ísraelskra stjórnvalda.

Við sendum ykkur því hér með ákall um að rjúfa samning KSÍ við Puma þar til fyrirtækið bindur sjálft enda á styrktarsamning sinn og stuðning við IFA og hættir að veita starfsemi í ólöglegum landtökubyggðum lögmæti. Með því að rjúfa samninginn getur KSÍ bæði forðast að vera dregið inn í herferðina og stuðlað að því að sannfæra Puma um að standa við yfirlýsta skuldbindingu sína gagnvart mannréttindum og hætta að styrkja og styðja stríðsglæpi!

Við erum ennþá tilbúin til þess að setjast niður með ykkur og ræða þetta mál frekar ef þið hafið áhuga á því.

Fyrir hönd stuðningsfólks frjálsrar Palestínu og aðgerðasinna BDS á Íslandi, 

Anna Margrét Pétursdóttir

Kristín Sveinsdóttir

Qussay Odeh

Sema Erla Serdar