Banda­ríkin form­lega gengin úr Parísar­sam­komu­laginu

Bandaríkin eru formlega gengin úr Parísarsamkomulaginu frá og með deginum í dag. Samkomulagið er frá árinu 2015 og kveður á um skuldbindingar ríkja til að draga úr losun gróðurhúsalofttegunda.

Donald Trump Bandaríkjaforseti tilkynnti Sameinuðu þjóðunum á síðasta ári frá ákvörðun Bandaríkjastjórnar að segja sig frá samkomulaginu. Parísarsamkomulagið kveður hins vegar á um eins árs biðtíma, ákveði ríki að segja sig frá því, og lauk honum í tilviki Bandaríkjanna í gær.

Joe Biden, forsetaframbjóðandi Demókrata, hefur sagst vilja að Bandaríkin gerist aðili að samkomulaginu á ný. Hefur hann sagt ljóst að mannkyni stafi hætta af loftslagsbreytingum og að Bandaríkin hafi siðferðislega skyldu til að bregðast við. Enn er óljóst hver bar sigur úr býtum í forsetakosningunum sem fram fóru í Bandaríkjunum í gær.

Trump tilkynntu um þá stefnu sína að segja sig frá Parísarsamkomulaginu árið 2017, en samkomulagið meinaði þátttökuríkjum að gera slíkt á fyrstu þremur árum eftir undirritun.

Bandaríkin er það ríki heims sem mengar næstmest á eftir Kína. Í forsetatíð sinni hefur Trump margoft dregið loftslagsvísindi í efa og talað fyrir aukinni olíu- og kolavinnslu. Á sama tíma hefur hann losað um allt regluverk í Bandaríkjunum sem ætlað er að stuðla að aukinni umhverfisvernd.