Ráðgáta um ólykt af heitavatni í Vesturbæ gæti verið leyst

Vísbendingar eru um að óvenjuleg lykt af heitu vatni í Vesturbæ Reykjavíkur, sem íbúar hafa m.a. kvartað undan á samfélagsmiðlum síðustu daga, komi úr borholum hitaveitu í Laugarnesi. Þetta kemur fram í tilkynningu um málið frá Veitum.

Fram kemur í tilkynningu að Veitum hafi borist ábendingar um lyktina frá íbúum. Ítarlegar greiningar séu í gangi á því hvað geti valdið, bæði hjá sérfræðingum hitaveitu og öðrum sérfræðingum.

Strax hafi verið gerðar mælingar á hitaveituvatninu í borholum í Laugarnesi, frá geymum í Öskjuhlíð sem fæða Vesturbæinn og í dælustöð á Fornhaga. Brennisteinsvetni (H2S), súrefni (O2) og sýrustig (pH) hafi verið mælt og niðurstöður allar eðlilegar. Sýni hafi einnig verið tekin í heimahúsum, tönkum og dælustöðvum.

Einnig var leitað til Háskóla Íslands með frekari greiningar. Veitur segja í tilkynningu að niðurstöður þeirra hafi útilokað að um sé að ræða létt, lífræn leysiefni, svo sem terpentínu, bensín, dísilolíu og skyld efni.

Vísbendingar séu þó um að lyktin komi úr tilteknum borholum hitaveitu í Laugarnesi og þær hafi verið teknar úr rekstri. 

„Talið er afar ólíklegt að skólp hafi borist í heita vatnið en hitaveitukerfið er rekið undir þrýstingi en fráveitan ekki sem þýðir að ef það er opið á milli þessara kerfa fer heitt vatn í fráveituna en ekki öfugt.

Veitur biðja fólk sem finnur óvenjulega lykt af vatninu að láta vita, með skilaboðum á Facebook, með pósti á veitur@veitur.is, eða hringja í síma 516 6000,“ segir í tilkynningu.