Lýsir mikilli partýstemmningu við eldgosið

Greinin var birt í gær en hún er hluti af greinaröð þar sem sérstaklega er fjallað um hvað sé helst í tísku að gera í borgum um allan heim, og hvernig sé hægt að upplifa það.

„Þetta var eins og á tónleikahátíð,“ er haft eftir Tomas Gustafsson, háskólanemenda sem ferðast hefur tvisvar hingað til lands til þess að verða vitni að eldgosinu. Fyrsta ferð hans var skömmu eftir að gosið hófst í vor.

„Það var hellingur af fólki á leiðinni átt að gosinu,“ er haft eftir Gustafsson. „Við grilluðum pylsur á hrauninu og drukkum bjór.“

Einnig er rætt við Ryan Connolly sem rekur ferðaþjónustufyrirtækið Hidden Iceland, en hann segist hafa ferðast með um þrjú hundruð Bandaríkjamenn að gosinu frá því í maí.

Í einni af þessum ferðum fór hann með vini sínum sem var nýútskrifaður úr háskóla.

„Hann tók með sex flöskur af kampavíni,“ er haft eftir Connolly. „Allir voru að opna kampavínsflöskur.“

Nýjasta æðið að fara á djammið eftir gönguna

Í greininni segir greinarhöfundur að nýjasta æðið á meðal ferðamanna sé að fara að eldgosinu og svo beint í bæinn til þess að halda skemmtuninni áfram. Er rætt við Bandaríkjamanninn Danny Manzouri, sem hélt steggjunina sína hér á landi í júní.

Segist hann hafa reiknað með að verða dauðþreyttur eftir gönguna en þegar til Reykjavíkur var komið klukkan eitt um nótt að göngu lokinni, var farið beint á djammið, enda adrenalínið á fullu eftir að hafa séð eldgos með eigin augum.

Á djamminu var skálað fyrir eldgosinu og segir Manzouri að eldgosið hafi í raun verið á allra vörum. Ókunnugir hafi skipst á sögum frá eldgosinu á meðan drykkir voru hesthúsaðir.

Segir Manzouri einnig að íslenska sumarnóttin hafi þessi áhrif á mannskapinn, ekki síst sú staðreynd að hér er bjart yfir nóttina stóran hluta sumars.

„Maður er bara aldrei þreyttur,“ er haft eftir Manzouri. „Sólin heldur manni gangandi.“

Enn streymir fjöldi fólks að gosstöðvunum á Reykjanesskaga á degi hverjum. Að sögn björgunarsveitarmanns er enn viðvarandi vandamál að fólk hætti sér út á hraunið og óhlýðnist tilmælum lögreglu og björgunarsveita.

Hann segir fólkið, sem eru að meirihluta erlendir ferðamenn, oft halda sig til hlés ef björgunarsveitarfólk er nálægt, en æða út á hraunið við fyrsta tækifæri, líkt og fjallað var um á Vísi í gær.