Willum boðar afléttingaráætlun

„Blessunarlega hefur þetta verið að þróast þannig í þessum faraldri og þessari bylgju að tölurnar eru að vinna með okkur og þá erum við alltaf að horfa á heilbrigðiskerfið sérstaklega, það að við ráðum við stöðuna og séum að veita alla aðra heilbrigðisþjónustu í landinu,“ sagði Willum í Bítinu á Bylgjunni.

Nú sýni gögn með vissu að bæði hafi meðallegutími Covid-sjúklinga styst á Landspítalanum og innlagnahlutfall minnkað til muna. Einnig þurfi fólk að vera í eftirliti Covid-göngudeildar í skemmri tíma en áður.

Fyrst þurfi að lækka viðbúnaðarstig

Stjórnvöld í sumum ríkjum hafa kynnt miklar afléttingar seinustu daga og Alþjóðaheilbrigðismálastofnunin sagt að ómíkrón afbrigðið geti markað endalokin á kórónuveirufaraldrinum í Evrópu. Fljótlega eftir að ómíkron náði yfirhöndinni víða um heim birtust vísbendingar um að afbrigðið valdi vægari einkennum en þau fyrri. Hafa heilbrigðisyfirvöld hér verið gagnrýnd fyrir að taka ekki nægilegt tillit til þeirrar þróunar.

„Það er rétt að taka fram að það er misjafnt hvar þjóðir eru staddar í bylgjunni og hvernig hún birtist okkur. Bólusetningarstaðan hér er mjög góð og svo hefur útsjónarsemin og hugvitið á Covid-göngudeildinni skipt máli, af því það er íþyngjandi að vera með þetta svona mikið á einum spítala,“ segir Willum.

„Þessi staða er að birtast okkur líka og þess vegna segjum við að við þurfum núna að taka þetta í skrefum.“

Samhliða því þurfi að lækka viðbúnaðarstig almannavarna og Landspítalans en spítalinn er búinn að vera á neyðarstigi frá 28. desember. Willum segir að með því hafi stjórn spítalans verið að kalla eftir utanaðkomandi aðstoð og ráðist hafi verið í aðgerðir til þess að heilbrigðiskerfið myndi ráða við stöðuna.

„Það þýðir að nú getum við farið að taka heilbrigðisþjónustuna okkar niður af neyðarstigi almannavarna og spítalann og svo getum við farið að aflétta hér samkomutakmörkunum og létta þessum sóttvarnaaðgerðum,“ segir Willum.

„Ég sé það fyrir mér að þetta gerist allt í þessum rökréttu skrefum í þessari viku og við boðum það hvernig við gerum þetta.“

Þannig að þú ert að segja að samkomutakmörkunum verði lyft í þessari viku?

„Það er vika í að þær sem eru núna renni út og um leið og við sjáum þetta gerast þá getum við boðað þessar afléttingar,“ segir Willum og reiknar fastlega með því að það verði gengið lengra en að fara aftur í tuttugu manna samkomutakmarkanir. Einnig sé útlit fyrir að slakað verði á takmörkunum á landamærum.

Ekki gengið of langt

Willum telur ekki rétt að stjórnvöld hafi gengið of langt með því að herða takmarkanir á sama tíma og vísbendingar voru um að innlagnahlutfall væri að lækka.

„Ég held að við höfum náð að hemja veiruna með spítala á neyðarstigi, þá hefði það nú verið óábyrgt að fara gegn ráðum okkar færustu sérfræðinga fyrir heilbrigðisráðherra sem hefur þá frumskyldu að sjá til þess að verja líf og passa upp á að heilbrigðiskerfið standist ágjöfina og geti veitt ekki bara Covid-umönnun heldur alla aðra heilbrigðisþjónustu samhliða.“

„Við vorum komin með þetta upp í 47 [sjúklinga] fyrir einhverjum tíu dögum síðan og sjö á gjörgæslu og þá voru menn ekki alveg öruggir miðað við tölurnar. Við vorum bara ekki komin með nóg af tölum inn í okkar líkan og þá var mikið delta inn á spítalanum.

Síðan höfum við náð meiri gögnum inn í spálíkönin og erum með sex sviðsmyndir sem við erum að vinna með þessum nýju tölum. Það lítur allt út fyrir miðað við þær sviðsmyndir að við getum létt samkomutakmörkunum og létt á þessum sóttvarnaráðstöfunum samhliða,“ segir Willum Þór Þórsson heilbrigðisráðherra. Hlusta má á viðtalið við hann í heild sinni í spilaranum hér fyrir neðan.