Lögin skýr um að það beri að aflétta þegar forsendurnar eru brostnar

Bjarni Benediktsson, fjármála- og efnahagsráðherra, segir ljóst að forsendur hertra samkomutakmarkana séu brostnar og að lögin kveði á um að takmörkunum verði aflétt. Þetta kom fram í máli hans í Kastljósi í kvöld. Að sögn Bjarna er það algjör undantekning að víðtækum aðgerðum sé beitt líkt og gert hefur verið í faraldrinum.

„Það segir skýrum stöfum í lögunum að engum opinberum sóttvarnaráðstöfunum megi halda úti nema brýna nauðsyn beri til og þeim beri að aflétta samkvæmt lögum eins fljótt og verða má,“ sagði Bjarni í viðtali hjá þáttastjórnendanum Sigríði Dögg Auðunsdóttur.

Hann benti á að þegar gripið var til tíu manna samkomutakmarkana þann 15. janúar síðastliðinn hafi það verið gert á grundvelli hugmynda um hversu mikill fjöldi smitaðra myndi valda álagi á spítalann en nú séu merki um að þróunin sé jákvæðari en fyrri spálíkön gerðu ráð fyrir.

Þórólfur Guðnason sóttvarnalæknir hefur þó talað fyrir því að hann vilji taka varfærin skref til afléttingar og sagðist Bjarni hafa fullan skilning fyrir því.

„Það er mjög mikið undir, það eru beinlínis líf undir og heilsa. Álagið og ástandið á spítalanum er líka undir í þessu, ég skil það, en við megum aldrei snúa röksemdarfærslunni í þessu máli á hvolf,“ sagði Bjarni og benti á að það væri ekki venjulegt ástand að hafa tíu manna samkomubann.

„Ég er að benda á það að samkvæmt lögunum þá ber ráðherranum að taka tillit til fleiri þátta heldur en það sem sóttvarnalæknir týnir til, það er beinlínis lagaskylda til ráðherrans,“ sagði Bjarni enn fremur. „Við megum aldrei ganga svo langt að framselja vald lýðræðislegra kjörinna fulltrúa, ráðherrans í þessu tilviki eða þess vegna þingmanna, til sérfræðinga.“

„Það er algjört neyðarúrræði að grípa svona inn í líf fólks“

Ríkisstjórnin kemur til með að funda um stöðu mála á morgun og koma þar afléttingar væntanlega til tals. Tillögur að afléttingaráætlun verða kynntar í lok vikunnar en sóttvarnalæknir hyggst leggja til tilslakanir á reglum um sóttkví í vikunni og afléttingar á samkomutakmörkunum í þeirri næstu.

„Ég lít á það sem skyldu mína að benda á það sem segir í lögunum. Ég skoða rökin og við verðum alltaf að muna að það er algjört neyðarúrræði að grípa svona inn í líf fólks,“ sagði Bjarni.

Aðspurður um hvort hann myndi sjálfur fara fram á afléttingar sagði Bjarni það í verkahring heilbrigðisráðherra. Hann telji að það hafi verið farsælt að fylgja tillögum sóttvarnalæknis í meginatriðum en þegar forsendurnar eru brostnar þurfi að draga ráðstafanir til baka.

„Þegar við skoðum þessar síðustu ráðstafanir, þá er það mín skoðun á grundvelli talnanna sem liggja núna á borðinu, að forsendurnar eru brostnar, þetta mun ég segja, en auðvitað ræður ráðherrann hvað hann gerir,“ sagði Bjarni.

„Ég er viss um að við verðum áfram farsæl í að koma okkur út úr þessu. Við erum að stefna í átt að frelsinu að nýju, það er það sem er jákvætt í stöðunni í dag.“