Segir Reykjavíkurflugvöll gríðarlega mikilvægan varavöll millilandaflugs

Kristján Már Unnarsson skrifar 26. ágúst 2022 22:12

Linda Gunnarsdóttir er yfirflugstjóri Icelandair og jafnframt flugstjóri á Boeing 757 og 767-þotum félagsins. Vísir

Yfirflugstjóri Icelandair segir gríðarlega mikilvægt að geta notað Reykjavíkurflugvöll sem varavöll millilandaflugs og kallar eftir betri innviðum á vellinum. Hann spari Icelandair hálfan milljarð króna á ári í eldsneytiskostnað og dragi verulega úr útblæstri koltvísýrings.

Í umræðunni að undanförnu hefur verið rætt um að nýjan varaflugvöll þurfi suðvestanlands. En hvaða þýðingu hefur Reykjavíkurflugvöllur sem slíkur og þarf einhvern annan völl?

Í fréttum Stöðvar 2 segir Linda Gunnarsdóttir, yfirflugstjóri Icelandair, að þörf sé á varaflugvelli suðvestanlands.

„Það hefur bara gríðarlega mikla þýðingu fyrir Icelandair að nota Reykjavík sem varaflugvöll.“

Linda segir Icelandair nota hann í fjörutíu prósent tilvika, bæði fyrir 757 og 737-þotur félagsins, sem mynda níutíu prósent af flugflotanum.

„Ef við gætum ekki notað Reykjavík sem varaflugvöll þá værum við að nota Egilsstaði og Akureyri. Þar er mjög takmarkað pláss fyrir farþegaþotur. Hvor völlur um sig tekur einungis um fjórar vélar í einu. Þannig að þá værum við að nota varaflugvelli í Norður-Evrópu,“ segir yfirflugstjórinn.

Yfirflugstjóri Icelandair segir þörf á flugstöð með vopnaleit og landmæraeftirliti á Reykjavíkurflugvelli.Egill Aðalsteinsson

Plássleysi á Reykjavíkurflugvelli sé þó einnig takmarkandi þáttur en þar áætli Isavia að hægt sé að leggja um tuttugu þotum.

„Eftir því sem varaflugvöllur er nær þeim flugvelli sem á að lenda á, í þessu tilviki Keflavík, þá þarf að bera minna eldsneyti, sem náttúrlega kostar minni peninga og það kostar líka minni útblástur.“

Með Reykjavíkurflugvelli sparist þannig háar fjárhæðir.

„Gróflega áætlað myndi kosta ca þrjú þúsund tonn af eldsneyti á ári, sem samsvarar tæplega tíu þúsund tonnum af koltvísýringi. Og ef við snúum þessu yfir í krónur og aura þá erum við að tala um einhversstaðar nálægt hálfum milljarði,“ segir Linda.

En þarf eitthvað að gera á Reykjavíkurflugvelli til að styrkja hann sem varaflugvöll?

„Það sem myndi nýtast okkur best er bara stærri flughlöð og betri innviðir. Flugstöð sem er til þess fallin að taka á móti millilandafarþegum og því sem þeim fylgir, eins og vopnaleit og landamæraeftirlit.“

En myndi það skaða hlutverk hans sem varaflugvallar ef Skerjafjarðarsvæðið yrði tekið undir íbúðabyggð?

„Eftir því sem þrengt er meira að vellinum þeim mun bara minni verða notkunarmöguleikar til framtíðar, klárlega. Byggingar nálægt flugvöllum hafa áhrif varðandi ókyrrð og annað slíkt,“ svarar yfirflugstjóri Icelandair.

Hér má sjá frétt Stöðvar 2:

Reykjavíkurflugvöllur Fréttir af flugi Icelandair Borgarstjórn Keflavíkurflugvöllur Eldgos í Fagradalsfjalli Loftslagsmál Umhverfismál Skipulag

Tengdar fréttir

Segja of snemmt að útiloka byggingu flugvallar í Hvassahrauni

Dagur B. Eggertsson borgarstjóri og Einar Þorsteinsson, formaður borgarráðs, segja báðir rétt að bíða eftir niðurstöðum áhættumats Veðurstofu Íslands vegna flugvallar í Hvassahrauni; of snemmt sé að útiloka þann möguleika.

8. ágúst 2022 07:25

Tryggja þurfi nýjan varaflugvöll og Reykjavíkurflugvöllur komi ekki til greina

Borgarstjóri segir óraunhæft að Reykjavíkurflugvöllur komi í stað hugmynda um flugvöll í Hvassahrauni. Byggja þurfi upp flugvöll á Suðvesturhorninu sem tekið geti við alþjóðaflugi. Reykjavíkurflugvöllur sé ekki undir það búinn.

6. ágúst 2022 13:35

Segir borgina ekki fá Skerjafjörð, hún verði að virða samkomulag

Sigurður Ingi Jóhannsson innviðaráðherra segir að Reykjavíkurborg fái ekki flugvallarland í Skerjafirði til íbúðabygginga meðan annar jafngóður eða betri kostur undir flugvöll er ekki uppbyggður. Ráðherrann segir leiðinlegt að þurfa ítrekað að slá á puttana á borgarstjórnarmeirihlutanum en borgin verði að virða tveggja ára gamalt flugvallarsamkomulag.

4. maí 2022 12:33

Ný loftferðalög skerða skipulagsvald sveitarfélaga yfir flugvöllum

Ný ákvæði laga um loftferðir, sem Alþingi samþykkti á lokasprettinum í fyrrinótt, gera skipulagsreglur flugvalla rétthærri skipulagi sveitarfélaga. Bæði Samband íslenskra sveitarfélaga og Reykjavíkurborg lögðust gegn lagabreytingunni og sagði fráfarandi borgarstjórnarmeirihluti í Reykjavík hana kollvarpa því skipulagsvaldi sem sveitarfélög hefðu yfir flugvöllum.

17. júní 2022 06:36

Segir það verstu niðurstöðuna að kremja lífið úr flugvellinum

Isavia telur sér ekki fært að verða við beiðni Reykjavíkurborgar um að afhenda flugvallarland í Skerjafirði til íbúðabygginga og varpar ábyrgðinni á Sigurð Inga Jóhannsson innviðaráðherra.

3. maí 2022 21:41

Atvinnuflugmenn brýna Isavia að verja rekstraröryggi flugvallarins

Öryggisnefnd Félags íslenskra atvinnuflugmanna varar við því að nýjar húsbyggingar í Skerjafirði skapi hættu fyrir flugvélar á Reykjavíkurflugvelli með ókyrrð og sviptivindum. Isavia er hvatt til að setja fótinn niður og tryggja rekstraröryggi flugvallarins.

16. febrúar 2022 21:20