Túfa látinn fara frá Östers IF

Túfa, sem hefur áður starfað hér á landi sem þjálfari hjá KA, Grindavík og sem aðstoðarþjálfari hjá Val, tók við þjálfun Östers árið 2022 og undir hans stjórn endaði liðið í 3. sæti sænsku B-deildarinnar á hans fyrsta tímabili með liðið. 

Stefnan var sett upp í sænsku úrvalsdeildina á nýafstöðnu tímabili en niðurstaðan var sú að liðið endaði í 4.sæti B-deildarinnar og hefur félagið nú ákveðið að breyta til. 

Er Túfa þakkað fyrir vel unnin störf í yfirlýsingu Östers. Fagmennska og mikill drifkraftur hafi einkennt hans störf hjá félaginu. 

„Frábær þjálfari og framúrskarandi manneskja sem við óskum alls hins besta í framhaldinu,“ lætur Vito Stavljanin, yfirmaður knattspyrnumála hjá Östers IF, hafa eftir sér í yfirlýsingu félagsins.