Platinum-tryggingin dekkaði ekki hurð sem fauk upp undir Hafnar­fjalli

Konan sem leigði bifreiðina hafði leigt hana dagana 20. til 26. febrúar á síðasta ári. Valdi hún „platinum“ trygginguna og segir fyrirtækið hafa hvatt hana til þess að gera það þar sem hún myndi þá ekki þurfa að greiða neinn kostnað ef bifreiðin yrði fyrir tjóni á leigutímanum.

Vill 230 þúsund krónur

Þegar konan lenti síðan í óveðri undir Hafnarfjalli fauk framhurð bifreiðarinnar upp og skemmdist. Þegar bílnum var skilað skuldfærði bílaleigan kreditkort konunnar um 2.400 dollara, 330 þúsund íslenskar krónur. Vildi hún hins vegar meina að hún þyrfti einungis að greiða 770 dollara, rétt rúmar hundrað þúsund krónur. Krafðist hún þess að fá hinar 230 þúsund krónurnar endurgreiddar. 

„Að sögn sóknaraðila hafi starfsmaður varnaraðila sagt henni að hún ætti að kaupa tryggingu sem myndi tryggja hana fyrir tjóni vegna sand- og malarfoks enda væri veðurfar á Íslandi að vetrarlagi oft slæmt. Hins vegar hafi viðkomandi starfsmaður ekki upplýst hana um að tjón sem hljótist af því að vindhviða feyki upp bílhurð falli ekki undir neinar af tryggingum varnaraðila,“ segir í úrskurði nefndarinnar. 

Ekki hluti af tryggingunni

Bílaleigan fékk tækifæri til þess að skila inn andsvörum og gögnum máli sínu til stuðnings. Það var ekki gert og byggist niðurstaða málsins því eingöngu á gögnum frá konunni sem kærði. 

Nefndin bendir á að í leigusamningi konunnar og bílaleigunnar sé tekið fram dæmi um atvik sem eru undanskilin tryggingunni. Er þar sérstaklega tekið fram að tjón vegna þess að vindur feykir up hurð sé ekki hluti af tryggingunni. Einnig mátti finna þessar upplýsingar á vef bílaleigunnar. 

Var kröfu konunnar því hafnað og þarf bílaleigan ekki að endurgreiða krónurnar 230 þúsund. Úrskurðinn má finna í heild sinni hér en hann er númer 31 á þessu ári.