Telja þúsundir Rússa hafa fallið við Avdívka

Þá telja Bandaríkjamenn að í heild hafi um 315 þúsund rússneskir hermenn særst eða fallið í átökunum í Úkraínu og að Rússar hafi misst um 2.200 skriðdreka. Fyrir innrásina áttu Rússar um 3.500 skriðdreka.

Þetta kemur fram í gögnum sem ríkisstjórn Joe Biden, forseta Bandaríkjanna, svipti leyndarhulu í dag vegna heimsóknar Vólódímírs Selenskí, forseta Úkraínu, til Washington DC. Biden er einnig að reyna að fá þingið til að samþykkja rúmlega sextíu milljarða dala fjárútlát til aðstoðar handa Úkraínumönnum.

Þingmenn Repúblikanaflokksins hafa sett sig gegn slíkum fjárútlátum. Einhverjir segjast efast um getu Úkraínumanna til að vinna stríðið gegn Rússum og þá krefjast Repbúlikanar umfangsmikilla aðgerða á landamærum Bandaríkjanna og Mexíkó í skiptum fyrir samþykkt hernaðaraðstoðar.

Samkvæmt frétt Politico segir í þessum gögnum að Rússar telji þrátefli á víglínunum í þeirra hag, þar sem slíkt geti dregið úr aðstoð handa Úkraínumönnum.

Þá er áætlað að rúmlega þrettán þúsund rússneskir hermenn hafi fallið í átökunum í Dónetsk-héraði í Úkraínu frá því í október. Flestir munu hafa fallið í átökunum við Avdívka, sem Rússar hafa lagt gífurlega mikið púður í að reyna að ná úr höndum Úkraínumanna frá því í október.

Sjá einnig: Reyna að umkringja úkraínska hermenn

Bardagar við Avdívka hafa verið gífurlega harðir og Rússar hafa sótt fram við bæinn frá því í október. Úkraínumenn brugðist við áhlaupinu með því að senda hermenn frá suðurhluta landsins til að styrkja varnir sínar á svæðinu.

Strax í lok október leit út fyrir að Rússar hefðu orðið fyrir gífurlegu mannfalli við Avdíka og að þeir hefðu tapað fjölmörgum skrið- og bryndrekum þar. Myndefni frá víglínunni hefur rennt stoðum undir slíkar greiningar.

Sjá einnig: Rússar sækja hart fram í austri

Úkraínskir hermenn hafa líkt rússneskum hermönnum við Avdívka við uppvakninga sem sækja fram í bylgjum.

Mannfall hefur einnig verið mikið meðal Úkraínumanna, samkvæmt embættismönnum sem New York Times vitnar í, en ekki í samræmi við mannfall meðal Rússa.

Þá hefur miðillinn eftir talskonu þjóðaröryggisráðs Bandaríkjanna að Vladimír Pútín, forseti Rússlands, fylgist grannt með þróun mála á þingi Bandaríkjanna og að hann telji sig sjá velgengi í þeirri áætlun sinni að halda stríðsrekstri sínum í Úkraínu áfram þar til bakhjarlar landsins gefist upp.

Svaraði spurningum þingmanna

Eins og áður segir er Selenskí í Washington, þar sem hann fundaði meðal annars með þingmönnum á báðum deildum þingsins. Ef marka má fréttaflutning vestanhafs gerði forsetinn þingmönnunum ljóst að Úkraínumenn myndu ekki hætta að berjast gegn innrás Rússa án aðstoðar Bandaríkjanna.

Hann sagði það ekki rétt að aðstoð Bandaríkjanna myndi ekki hjálpa Úkraínumönnum við að binda enda á þráteflið og sagði aðstoðina gífurlega mikilvæga við að vernda fullveldi Úkraínu.

Í færslu sem hann birti á X sagði Selenskí viðræðurnar hafa verið vinalegar og hreinskilnar.

Óljóst er hvort að viðræðurnar sneru einhverjum Repúblikönum. Einn þeirra sagði eftir fundinn að Repúblikanar vildu aðstoða Úkraínumenn. Þeir vildu einnig fá aðgerðir á landamærunum og myndu ekki gefa eftir varðandi það.

NYT hefur eftir Mike Johnson, forseta fulltrúadeildarinnar, þar sem Repúblikanar eru með meirihluta, að fundurinn með Selenskí hefði verið góður. Hann gagnrýndi þó ríkisstjórn Bidens fyrir að geta ekki gert grein fyrir mögulegri leið Úkraínumann að sigri.

Þá ítrekaði hann að þjóðaröryggi Bandaríkjanna væri í forgangi og vísaði hann þar til áðurnefndra landamæra.