Vilja betra eftir­lit með komum til Grinda­víkur

Enn eru taldar miklar líkur á eldgosi en landris hefur haldið áfram síðustu daga og kvikusöfnun samhliða því. Líklegasta upptakasvæðið er á milli Stóra-Skógfells og Hagafells

Miðað við magn kviku sem flæðir eru taldar nokkrar vikur í það, líklega tvær eða þrjár. Líkurnar aukast með hverjum deginum sem líður.

Enn er sólarhringsopnun í Grindavík en sú opnun verður endurskoðuð á föstudag samhliða útgáfu nýs hættumatskort. Eins og stendur er fyrirkomulagið þannig að við innkomu eru lokunarpóstar sem eru mannaðir af starfsfólki Öryggismiðstöðvarinnar. Einhverjir íbúar eru ósáttir við þetta fyrirkomulag og vilja að meira sé gert. Í gær var greint frá því að tveimur gaskútum og grillábreiðu hefði verið stolið um jólin sem hefur valdið mörgum áhyggjum. Lögreglustjórinn á Suðurnesjum sagði fyrr í dag að hann sæi ekki fyrir sér að breyta fyrirkomulaginu vegna þess en að þetta væri til skoðunar.

Allir sem ætla til Grindavíkur þurfa að stoppa við lokunarpóstinn. Þar er fólk spurt hvort það eigi heima í bænum eða ekki. Ekki er spurt um nafn og ekki er spurt um skilríki.

„Manni finnst þetta vera léttvægt. Manni finnst lítið spekúlerað í því hverjir eru að koma. Maður tilkynnir í hliðinu að maður sé íbúi og er vísað í gegn. Maður er ekki krafinn um að gera neina grein fyrir sér,“ segir Bjarki Sigmarsson.

Sirrý Ingólfsdóttir tók undir það og sagðist vilja meira eftirlit.

„Maður er ekkert ánægður með það. Maður vill hafa stanslaust. Þetta eru eignir okkar.“

Ellert Vopni Olgeirsson sagði það ekki góða stöðu að fólk sé að upplifa þjófnað.

„Það þarf bara að taka kennitölur hjá fólki og skrá hverjir eru. Það eru hlutir farnir að hverfa á pöllunum hjá fólki. Þetta á ekki að vera svona.“

Óttast þú um eigur þínar?

„Nei, ég er búinn að taka megnið þannig ég óttast ekki mikið. Ég er með myndavélar í húsinu,“ segir Ellert en hann og konan hans ákváðu að færa búslóðina í íbúð sem þau fengu í Hafnafirði. Þar fá þau að vera fram á vor og sjá ekki endilega fram á að snúa aftur til Grindavíkur.

Björn Haraldsson eða Bangsi eins og flestir þekkja hann í Grindavík sagðist sáttur við fyrirkomulagið eins og er. Hann sagðist vilja koma aftur en fjölskyldan væri mótfallin því.

„Það eina sem ég get sett út á er að það eru menn að stjórna sem þekkja ekki til. Eru ekki héðan. En þetta er svosem allt í lagi.“

Þannig þú ert bara sáttur?

„Já. Það er ekki verið að skjóta á mig, ég er ekki svangur og ég sef í þurru rúmi. Það eru forréttindi í dag.“

Sumir fara heim og aðrir ekki

Þrátt fyrir óöryggi með eignir og eigur þótti fólki gott að koma heim en bíður þó með það að flytja alfarið til baka.

„Við vorum nú á þessu að við ætluðum að fara um leið og við gætum. En þegar það gaus um daginn breyttist aðeins hljóðið í konunni og það er beygur í henni. Ég skil það alveg. Maður þarf að koma kannski nokkrum sinnum og venjast hlutunum.“

Svo eru aðrir sem fara heim af einskærri neyð.

„Það er ekkert út af því að við viljum það. Það er út af því að við erum ekki með fast húsnæði og við viljum ekki borga fyrir tvær íbúðir. Þetta er bara það eina í stöðunni því við erum ekkert að fara að selja á næstunni,“ segir Inga Rún Svansdóttir en hún og Sirrý, móðir hennar, voru staddar í bænum til að skoða húsið og taka stöðuna.