Af hverju kýs ég Sam­fylkinguna?

Við lifum á tímum áskorana þar sem mismunur á aðstæðum fólks getur haft djúpstæð áhrif á lífsgæði þess. Það er ekki nóg að bjóða upp á yfirborðskenndar lausnir eða frasa heldur er þörf á stefnu sem miðar að raunverulegum og varanlegum breytingum. Núna er mikilvægt að velja þann flokk sem hefur skýra sýn og raunhæfar aðgerðir til að mæta þörfum allra í samfélaginu, stendur vörð um sína viðkvæmustu þegna og leggur áherslu á að styrkja velferðarkerfið til hagsbóta fyrir öll, ekki síst þau sem búa við erfiðar aðstæður.

Ég vil gjarnan koma því á framfæri hvers vegna ég kýs Samfylkinguna. Ástæðan er nefnilega ekki eingöngu sú að ég er á lista í Reykjavík suður. Ég hef tekið eftir því að fólk sem ég hef verið að aðstoða í ýmsum félagslegum málum sem öðrum virðist ekki vita hvað það á að kjósa og endar oftar en ekki á því að velja flokk sem vinnur gegn þeirra hagsmunum.

Öflug meðferðarúrræði

Fleiri og öflugri sértæk meðferðarúrræði fyrir fólk með fjölbreyttar þarfir. Það vantar algjörlega áfallamiðuð úrræði fyrir veikasta hópinn okkar sem á við vanda með vímuefni í æð og jafnvel er með fjölþættan vanda. Þá hefur barnamálaráðherra algjörlega mistekist allt í tengslum við meðferðarúrræði barna og hefur nú tekið upp á að vista börn á lögreglustöð í Hafnarfirði! Það munum við í Samfylkingunni aldrei gera. Við þurfum að umgangast börn í vanda með kærleika og leggja áherslu á virðingu og mannréttindi.

Vímuefnamál

Samfylkingin vill regluvæða neysluskammta vímuefna, hætta að refsa neytendum og stórauka forvarnir og félagsstarf. Skaðaminnkun skal vera leiðandi í öllu starfi og þjónustu við neytendur en einnig þarf að tryggja lagalegan grundvöll skaðaminnkunar og starfsfólks sem vinnur í kringum þennan málaflokk. Við ætlum að tryggja fjármagn fyrir neyslurými og gera öðrum úrræðum eins og neyðarskýlum að starfræka slíkt rými.

Heimilislausir

Í málaflokki heimilislausra þarf ríkið að stíga fast inn og veita fé til sveitarfélaga til að takast á við þennan sístækkandi vanda. Lögfesta þarf skyldu sveitarfélag til að sjá um sína íbúa en það gerist ekki nema í samstarfi við ríkið. Við ætlum ekki að láta fólk sofa úti! Þegar kemur að heimilislausu fólki með með miklar og flóknar þarfir þarf raunveruleg úrræði þar sem nokkur ráðuneyti þurfa að vinna saman að lausninni sem getur verið flókin enda engin manneskja eins. Fjölgun félagslegs húsnæðis er mikilvæg en mörg í þessum flokki þurfa stuðning við hæfi. Útbúa þarf strax nýtt úrræði fyrir hættulega sakhæfa einstaklinga sem þurfa sólarhringsaðstoð. Það er almannaheillamál.

Fangamál

Við sjáum þörfina fyrir endurskoðun á fangelsiskerfinu með það að markmiði að auka áherslu á endurhæfingu fremur en refsingu. Við viljum byggja nýtt fangelsi sem uppfyllir nútímakröfur og tryggja að fangar fái nauðsynlega þjónustu og menntun til að auðvelda þeim að snúa aftur út í samfélagið sem virkir þátttakendur. Enginn þekkir fangelsiskerfið eins vel og ég. Ég mun tryggja að Samfylkingin geri fangelsiskerfið þannig að við fáum fólk úr fangelsum sem verði nýtir og góðir samfélagsþegnar. Við ætlum okkur að hafa fangavist með innihald og markmið þannig að við útskrifum ekki öryrkja úr fangelsunum heldur múrara, smiði, rafvirkja, pípara og kokka. Við ætlum okkur að breyta þeirri þróun að fólk sem hefur verið í fangavist verði á varnalegri framfærslu ríkis eða sveitafélaga það sem eftir er ævinnar. Við viljum sjá árangur af dýrri fangavist. Börn í afplánun skulu fá þá endurhæfingu sem þau þurfa og aðstandendur þeirra þá hjálp og aðstoð sem þau þurfa svo gríðarlega mikið á að halda.

Félagasamtök eins og Afstaða spila lykilhlutverk í að stuðla að betrun fanga með félagslegum stuðningi og ráðgjöf á jafningagrundvelli ásamt því að vera leiðandi í umræðunni um fangelsismál. Samfylkingin skilur mikilvægi þessara samtaka og leggur áherslu á að efla þetta samstarf til að stuðla skilvirkara fangelsiskerfi og aðstoð við endurhæfingu með mannúð að leiðarljósi.

Geðheilbrigðismál er ein helsta áskorun okkar í dag og verður næstu áratugina

Við þekkjum þörfina fyrir aukinn stuðning við fjölskyldur og börn sem búa við geðraskanir eða vímuefnatengda erfiðleika. Samfylkingin leggur áherslu á að fjölga úrræðum og tryggja að fjölskyldur þessara barna fái þann stuðning sem þær þarfnast til að tryggja börnum sínum betri framtíð. Það þýðir fleiri og öflugri meðferðarúrræði og heimili fyrir börn og ungt fólk.

1. Einstaklingsmiðuð og fjölbreytt meðferðarúrræði,
2. Tryggja aðkomu sem flestra fagaðila sjúklingnum í hag
3. Leggja áherslu á þverfaglega teymisvinnu og fagleg vinnubrögð

Ég kýs Samfylkinguna til að tryggja að öll þessi mikilvægu málefni fái þann stuðning og þá úrlausn sem nauðsynlegt er. Enginn á að vera útundan í samfélagi sem leggur ríka áherslu á jafnrétti og velferð. Það er á okkar höndum að velja stjórnmálafólk sem stendur með okkur öllum og líka jaðarsettum. Ekki gleyma hvaðan þú kemur. Veljum framtíðina og veljum Samfylkinguna.

Höfundur er formaður Afstöðu og í 9. sæti Samfylkingarinnar í Reykjavík suður.