Greiði milljarða í arð í stað þess að lækka vexti til al­mennings

Vilhjálmur stingur niður penna á Facebook í tilefni uppgjörs íslensku bankanna fyrir árið 2024. Þeir skiluðu samanlögðum hagnaði upp á tæpa hundrað milljarða og stefna á að greiða hluthöfum sínum arðgreiðslur upp á samannlagt 69 milljarða króna.

„Það er galið að horfa upp á það að Arion banki, Íslandsbanki og Kvika séu að greiða hluthöfum sínum samtals 50 milljarða króna í arð á næstu misserum – en nú hefur Landsbankinn einnig tilkynnt að hann muni greiða 19 milljarða í arðgreiðslu,“ segir Vilhjálmur.

„Samtals nema arðgreiðslur þessara fjögurra banka því 69 milljörðum króna – meira en sjálfir kjarasamningarnir kostuðu! Til samanburðar var fullyrt að stöðugleikasamningarnir, sem gerðir voru í mars í fyrra og kostuðu 60 milljarða, væru nauðsynlegir til að tryggja efnahagslegan stöðugleika.“

Fjármagnið komi ekki úr lausu lofti.

„Það er rifið út úr vösum almennings með okurvöxtum, himinháum þjónustugjöldum og gríðarlegum vaxtamun sem bankarnir græða óhikað á. Á meðan heimili og fyrirtæki berjast við að ná endum saman, moka bankarnir hagnaði sínum í vasa fjárfesta í stað þess að lækka kostnað fyrir almenning.“

Vilhálmur sendir ríkisstjórninni óformlega fyrirspurn í færslu sinni.

„Ætlar ríkisstjórn sem kennir sig við félagshyggju, réttlæti og jöfnuð að láta þetta átölulaust? Því þessi græðgisvæðing í bankakerfinu er ekkert annað en dulin skattlagning á launafólk, heimili og almenning!“