Efast um að ráð­herra sé í her­ferð gegn fjöl­miðlum

Morgunblaðið birti í dag fréttaskýringu þar sem rakið er að Logi Einarsson menningarmálaráðherra hafi snemma í janúar lagt fram minnisblað á ríkisstjórnarfundi þar sem lagt var til að stuðningur við fjölmiðla héldist óbreyttur til eins árs.

Í febrúar hafi hins vegar verið boðað að hámarksstyrkir til fjölmiðla yrðu lækkaðir, en þær breytingar myndu aðeins snerta Árvakur, útgáfufélag Morgunblaðsins, og Sýn, sem heldur úti Vísi, Stöð 2 og Bylgjunni.

Í millitíðinni hóf Morgunblaðið að fjalla um styrki hins opinbera til Flokks fólksins og aðrir fjölmiðlar fylgdu í kjölfarið. Sigurjón Þórðarson, þingmaður Flokks fólksins sagðist í kjölfarið telja að endurskoða þyrfti styrki til Morgunblaðsins vegna umfjöllunar styrki til flokksins.

Gagnrýna breytinguna

Blaðamannafélag Íslands skilaði umsögn í gær um hina fyrirhuguðu breytingu í gær, þar sem kallað var eftir skýrari rökstuðningi.

„Þar gagnrýndum við þessa breytingu. Okkur finnst mjög ógagnsætt hverju hún á að skila og hvers vegna er verið að lækka þetta þak til eins árs þegar er búið að boða breytingar á aðgerðum til stuðnings fjölmiðlum og þar á meðal þessum fjölmiðlastyrkjum á næsta ári,“ segir Sigríður Dögg Auðunsdóttir, formaður Blaðamannafélags Íslands.

Hún ætli þó ekki að gera ráðherra það upp að ráðast í breytingarnar vegna umfjöllunar Morgunblaðsins.

„Þó að Sigurjón Þórðarson hafi nú hótað þessu þá hef ég bara meiri trú á Loga Einarssyni og þessari ríkisstjórn í heild sinni en það, enda væri það grafalvarlegt mál. Á hinn bóginn finnst mér að þau þurfi að koma fram og útskýra betur hvað þarna býr að baki,“ segir Sigríður Dögg.

Þörf á réttlátu samkeppnisumhverfi

Jens Garðar Helgason, varaformaður Sjálfstæðisflokksins, segir málið vekja upp grunsemdir meðal stjórnarandstöðuliða, um að stefnubreytingin helgist af afstöðu Sigurjóns til fjölmiðlastyrkja.

„Þá ætlar ríkisstjórnin greinilega að fara að lækka styrkina til ákveðinna fjölmiðla sem þeim finnst óþægilegur ljár í þúfu,“ segir Jens Garðar.

Hann telur kerfið einfaldlega vera gallað. „Það að stjórnmálamenn hafi þetta vald til þess að annað hvort gefa í eða draga úr fjárveitingum til fjölmiðla eftir eigin geðþótta, í staðinn fyrir að búinn sé til sá jarðvegur – eins og ég var að ræða við ráðherra í gær í þinginu – að það sé sá jarðvegur fyrir henda sem að skapar réttlátt samkeppnisumhverfi fyrir fjölmiðla á Íslandi,“ segir Jens Garðar Helgason.

Logi Einarsson menningarráðherra gaf ekki kost á viðtali um málið fyrir hádegisfréttir.