Vilja aðra til­lögu í stað Völugötu sem átti að koma í stað Bjargargötu

Þetta kemur fram í fundargerð umhverfis- og skipulagsráðs, en nafngiftin á götunni – sem er ein þriggja gatna sem mynduðust við nýlega uppbyggingu á svæðinu í kringum Grósku – hefur ekki gengið vandræðalaust fyrir sig. Áður hafði götunafnanefnd borgarinnar lagt til að gatan fengi nafnið Bjargargata og hinar tvær Ingunnargata og Torfhildargata.

Örnefnanefnd taldi hins vegar að tillaga um nafnið Bjargargötu – sem liggur milli Sturlugötu og Eggertsgötu – geta ógnað öryggi fólks þar sem nafnið væri of líkt Bjarkargötu sem væri að finna hinum megin Hringbrautar. Ruglingur gæti þannig skapast þegar óskað væri eftir aðstoð lögreglu, slökkviliðs eða sjúkrabíl.

Vilja heiðra merkar konur á sviði klassískra fræða

Með tillögu götunafnanefndar um Bjargargötu, Ingunnargötu og Torfhildargætu vildi nefndin heiðra merkar konur á sviði hinna klassísku fræða; þær Björgu Caritas Þorláksson, fyrstu íslensku konuna til að ljúka doktorsnámi, Ingunni Arnórsdóttur, íslenskri menntakonu og kennara sem var uppi á 12. öld og Torfhildi Hólm, fyrstu íslensku konunni sem skrifaði skáldsögur. Nöfnin þóttu líka falla vel að götuheitum sem fyrir voru á svæðinu og skapa mótvægi við þau karlmannsnöfn sem þær eru kenndar við – Sturlugötu, Aragötu, Oddagötu, Sæmundargötu og Eggertsgötu.

Þegar tillögu um nafninu Bjargargötu var vísað aftur til götunafnanefndar var það niðurstaða hennar að kvenmannsnafnið Vala félli best að svæðinu. Vala væri nýrri mynd orðsins völva og væri vísað til heitisins í þekktasta fornkvæði Íslendinga, eddukvæðinu Völuspá.

Nafnið myndi þannig vísa til íslensks menningararfs og fornfræða og falla afar vel að öðrum götuheitum svæðisins. Sömuleiðis væri hægt að tengja nafnið við eitt þekktasta nýyrði Íslendinga, tölva, sem væri myndað með samsetningu orðanna tala og völva.

„Við götuna stendur húsið Gróska, sem hýsir öflugt nýsköpunarsamfélag sem byggist að miklu leyti í kring um tölvutækni. Tölvunarfræðideild Háskóla Íslands er einnig með aðsetur í húsinu. Því þykir nefndinni viðeigandi að heiti götunnar skapi hughrif við tölvutækni,“ segir í gögnum málsins.

Götunafnanefndinni þótti þannig fara vel á að í nýju heiti götunnar mætti finna skírskotun til bæði fortíðar, nútíðar og framtíðar þar sem nýsköpun og forn og merkur fræðaarfur Íslendinga myndi mætast í nýju heiti, það er Völugötu.

Konu af holdi og blóði

Dóra Björt Guðjónsdóttir, borgarfulltrúi Pírata og formaður umhverfis- og skipulagsráðs, sagði í samtali við RÚV í gær að meirihluti ráðsins vilji hins vegar frekar að leitast verði eftir því að nefna götuna í höfuðið á konu af holdi og blóði. 

„Göturnar þarna í kring eru nefndar eftir konum sem hafa verið öflugar þegar kemur að hinum klassísku fræðum svo það hljóta að vera önnur tækifæri til þess að nota þetta sem tækifæri til að hylla konur fyrir eitthvað sem þær hafa gert markvert,“ sagði Dóra Björt.

Ráðið óskaði því eftir því að götunafnanefnd endurskoði tillögu sína með tilliti til fordæma á svæðinu.