Þrettán skemmti­ferða­skip og Ís­land upp­selt

Undirbúningur fyrir almyrkva á sólu sem verður þann 12. ágúst á næsta ári er nú þegar hafinn og hafa stærstu sveitarfélögin þar sem almyrkvinn mun ganga yfir skipað stýrihóp til að gera ráðstafanir fyrir stóra deginum.

Sævar Helgi Bragason, betur þekktur sem Stjörnu Sævar, heldur úti sérstakri vefsíðu fyrir almyrkvann og er öllum stýrihópunum til ráðgjafar.

„Enda eru því miður ekki margir Íslendingar sem hafa orðið vitni að almyrkva á sólu og vita hvers lags fár þetta verður en ég hef séð fjóra og þekki þetta út og inn. Stýrihóparnir eru kannski fyrst og fremst að reyna finna og merkja þau svæði þar sem fólk getur komið saman í stórum hópum. Þá erum við kannski að tala um nokkra tugi upp í kannski þúsund manns á einhverjum stöðum. Það er að mörgu að huga í þeim efnum. Til dæmis aðgengi að bílastæðum, salernum og veitingasölu og slíkt.“

Að minnsta kosti þrettán skemmtiferðaskip eru nú þegar bókuð á leiðinni til landsins fyrir almyrkvann. Tugir þúsunda manna munu leggja leið sína til landsins sérstaklega fyrir almyrkvann.

„Þetta eru þá skip sem munu koma og leggja í höfn við Ísland. Þannig það verða þúsundir manna um borð í þeim. Er einhver tala sem má búast við fjölda fólks til landsins. Við vitum ekki þá tölu nákvæmlega. Við vitum hins vegar að Ísland er að verða svo gott sem uppselt í gistirýmum fyrir þetta tímabil. Svona tíunda til þrettánda ágúst eða svo.“

Erlendir ferðamenn séu þó ekki sá hópur sem sé líklegastur til vandræða. Um brýnt öryggismál sé að ræða.

„Af því eins og ég segi alltaf og þreytist ekki á að segja. Þetta verður svo miklu meira fár en fólk gerir sér grein fyrir. Vandamálið verður ekki endilega útlendingarnir heldur verða Íslendingarnir sjálfir sem mæta kannski seint og síðar meir á svæðið og þá getur skapast kannski pínu örtröð.“