SAS í sókn og kaupir 55 brasilískar vélar

Agnar Már Másson skrifar 1. júlí 2025 17:27

SAS-flugvél af gerðinni Airbus A320. Nú munu 55 Embrear-vélar bætast í flotann. SAS

Skandinavíska flugfélagið SAS hyggst ráðast í gríðarstóra fjárfestingu sem felst meðal annars í kaupum á 55 flugvélum frá brasilíska framleiðandanum Embraer.

Er þetta stærsta fjárfesting sem félagið ræðst í tæplega þrjá áratugi, eða síðan 1996, en í dag rekur félagið 164 flugvélar. Þannig mun fjölga um þriðjung í SAS-flotanum með tilkomu nýrra véla af tegundinni Embraer E195-E2. Vélarnar munu heyra undir dótturfélagið SAS Link.

Fjárfestingin nemur 25 milljörðum danskra króna á næstu fjórum árum, eða fimm billjónum íslenskra króna, að því er danska ríkisútvarpið greinir frá. Fyrstu nýju vélarnar eru sagðar munu bætast við flotann árið 2027.

Flugfélagið varð til árið 1946 við sameiningu hins danska DDL, norska DNL og sænska SILA. Félagið hefur allnokkra viðveru á Keflavíkurflugvelli og er þjónustað þar af íslenska flugfélaginu Icelandair.

Í febrúar tilkynnti SAS að það hygðist fjölga sumarflugferðum frá Stokkhólmi til Keflavíkur vegna aukinnar eftirspurnar á ferðum til Íslands.

Fréttir af flugi Danmörk Noregur Svíþjóð