Sam­komu­lagið það besta mögu­lega í erfiðum að­stæðum

Šefčovič ræddi við fjölmiðla fyrir stundu en samkomulagið, sem felur í sér fimmtán prósent almennan toll á vörur frá Evrópu, hefur vakið misjöfn viðbrögð. Flestir virðast á því að um sé að ræða nokkurn sigur fyrir Donald Trump Bandaríkjaforseta og ásættanlega lendingu fyrir ESB, að minnsta kosti í bili.

Þegar viðræður hófust höfðu stjórnvöld vestanhafs hótað Evrópusambandsríkjunum með 30 prósent flötum tolli á allan innflutning. Šefčovič sagði viðræðurnar hafa opnað „nýjan kafla“ í samskiptum aðila, sem væru nú meðvitaðri um viðhorf og afstöðu hvors annars.

Samkomulagið felur meðal annars í sér að tollar á bifreiðar verða lækkaðir úr 27,5 prósentum í fimmtán prósent. Šefčovič lagði áherslu á það á blaðamannafundinum að menn yrðu að horfa á það jákvæða; það sem Bandaríkjamenn hefðu gefið eftir og það sem hefði getað orðið.

Vísaði hann þar til hótana Bandaríkjamanna um mun hærri tolla.

„Sumum kann að þykja viðskiptastríð aðlaðandi en afleiðingar þess yrðu alvarlegar. Með 30 prósent tollum myndu viðskipti yfir Atlantshafði í raun og veru stöðvast og nærri fimm milljón starfa vera sett í alvarlega hættu, meðal annars störf í litlum og miðstórum fyrirtækjum í Evrópu,“ sagði Šefčovič.

Það hefði þótt fýsilegast í stöðunni að forðast „stigmögnun“ og vinna að hraðvirkandi lausn.

Šefčovič lagði einnig áherslu á orkumál og benti á að Evrópuríkin hygðust hætta að nota olíu frá Rússlandi fyrir árið 2027. Þá ítrekaði hann mikilvægi samstarfs Evrópu og Bandaríkjanna í tæknimálum, til að mynda á sviði gervigreindar.

Fyrstu viðbrögð ráða- og embættismanna í Evrópu virðast á þá leið að um hafi verið að ræða bestu lendinguna í bili en fáir hafa beinlínis lýst ánægju með niðurstöðuna. 

Manfred Weber, þingflokksformaður Evrópska þjóðarflokksins á Evrópuþinginu, endurómaði álit margra þegar hann sagði samkomulagið „skaðaminnkunarúrræði“ og ekkert til að fagna sérstaklega í viðtali við Bild.