Erlent

„Ekki taka. Endur­heimta. Þetta er okkar“

Samúel Karl Ólason skrifar
Vladimír Pútín, forseti Rússlands, og Alexander Lúkasjaneka, forseti Belarús.
Vladimír Pútín, forseti Rússlands, og Alexander Lúkasjaneka, forseti Belarús. AP/Gavriil Grigorov

Vladimír Pútín, forseti Rússlands, sagðist í dag vonast eftir því að hægt væri að hefja friðarviðræður við Úkraínu. Hann gaf þó til kynna að vindurinn væri í seglum Rússa um þessar mundir og að hann væri alls ekki tilbúinn til að láta af umfangsmiklum kröfum Rússa.

Enn fremur sagði forsetinn að Rússar væru ekki að leggja undir sig land í Úkraínu, heldur væru þeir að endurheimta land sem þeir ættu fyrir. Þá sagði hann að enginn rússneskur hermaður hefði fallið af tilefnislausu.

Sjá einnig: Pokrovsk riðar til falls

Þetta er meðal þess sem kom fram á blaðamannafundi Pútíns með Alexander Lúkasjenka, einræðisherra Belarús, í Rússlandi í dag.

Þar talaði Pútín um ummæli Donalds Trump, forseta Bandaríkjanna, sem gaf Pútín nýverið tíu til tólf daga til að koma á friði, annars yrðu refsiaðgerðir gegn Rússlandi hertar. Trump sagðist einnig verulega vonsvikinn út í Pútin.

Rússneski forsetinn sagði vonbrigði Trumps vera til komin vegna of mikilla væntinga. Raunsæi þyrfti að vera í fyrirrúmi.

Pútín sagði að markmið Rússa hefðu ekki breyst.

Markmið Rússa og kröfur þeirra í garð Úkraínumanna virðast lítið hafa breyst frá því innrás þeirra hófst í febrúar 2022. Úkraínumenn hafa ítrekað sagt þessar kröfur vera óásættanlegar þar sem þær geri ríkið berskjaldað gegn annarri innrás og að Úkraína verði í raun leppríki Rússlands. Um uppgjöf væri að ræða.

Sjá einnig: Með sömu óásættanlegu kröfurnar

Pútín sagði einnig að innrásina í Úkraínu þyrfti að ræða í samhengi fyrir öryggi allrar Evrópu. Í fyrri ummælum hefur Pútín látið sambærileg orð falla um kröfu sína um að ríkjum Austur-Evrópu verði vísað úr Atlantshafsbandalaginu.

Fyrir innrásina í Úkraínu krafðist Pútín þess að Úkraínu yrði meinaður aðgangur að NATO og að bandalagið myndi flytja alla hermenn og búnað úr aðildarríkjum sem gengu til liðs við bandalagið eftir 1997. Þar á meðal eru Pólland og Eystrasaltsríkin, sem hafa varað við því að Rússar vilji auka umsvif sín á svæðinu og draga úr fullveldi þeirra.

Pólland, Ungverjaland og Tékkland gengu til liðs við Atlantshafsbandalagið árið 1999. Árið 2004 gerðu Búlgaríu, Rúmenía og Slóvakía það einnig auk Eystrasaltsríkjanna Eistlands, Lettlands og Litháen. Í kjölfarið af því gengu Albanía, Króatía, Svartfjallaland og Norður Makedónía það einnig. Þessi ríki eru á gömlu yfirráðasvæði Sovétríkjanna.

Sjá einnig: „Það eru ekki við sem höfum ógnað neinum“

Á einum tímapunkti sagði Lúkasjenka að Úkraínumenn ættu að hlaupa til Pútín og grátbiðja hann um friðarviðræður. Annars myndu Rússar „taka allt“ af þeim á einum eða tveimur mánuðum.

Þá greip Pútín inn í og sagði:

„Ekki taka. Endurheimta. Þetta er okkar.“

Vólódímír Selenskí, forseti Úkraínu, lýsti því yfir í kjölfarið að ef Pútin hefði raunverulegan áhuga á friði ætti hann að hitta hann. Þeir ættu að ræða frið af alvöru í stað þess að reyna eingöngu að vinna inn tíma og forðast frekari refsiaðgerðir.

Selenskí sagðist tilbúinn í leiðtogafund hvenær sem er. Hann hefði lagt það til áður og það hefðu Bandaríkjamenn gert einnig. Pútín sjálfur hefði þó ekki viljað hitta Selenskí.


Tengdar fréttir

Samþykkja ný lög um spillingarrannsóknir eftir mótmæli

Vólódímir Selenskí, forseti Úkraínu, skrifaði í dag undir lög sem snúa við mjög svo umdeildum lögum gegn sjálfstæði embætta sem rannsaka opinbera spillingu. Með því hafa stofnanirnar tvær, sem kallast NABU og SAPO, öðlast sjálfstæði frá framkvæmdavaldinu á nýjan leik en er það í kjölfar umfangsmikilla mótmæla í Úkraínu gegn fyrri lögunum og vegna mótmæla frá bakhjörlum Úkraínumanna í Evrópu.

Létu sprengjum rigna á Kænugarð

Að minnsta kosti sex létu lífið og fleiri en fimmtíu eru sárir eftir að Rússar gerður loftárásir á Kænugarð höfuðborg Úkraínu í nótt.




Fleiri fréttir

Sjá meira


×