„Hlustið á leik­mennina“

Gísli og Viktor komu fyrir í myndbandi sem var birt á samfélagsmiðlum leikmannasamtakanna (EPHU) en auk þeirra má einnig nefna stórstjörnur úr handboltanum á borð við Ludovic Fabregas, Henny Reistad og Emmu Lindqvist.

„Hlustið á leikmennina. Virðið leikmennina. Leikmennirnir standa saman. Við erum með rödd en við verðum að vera í herberginu svo hún heyrist þegar ákvarðanir eru teknar“ segir meðal annars í myndbandinu.

Skilaboðin eru skýr hjá þessum leikmönnum, þau vilja sæti við borðið þegar ákvarðanir eru teknar og vilja minnka leikjaálagið almennt í handboltanum.

„Við höfum sagt áður að fjöldi leikja er of mikill. Leikmenn eru manneskjur, ekki maskínur. Virðið leikmennina. Líkamlega og andlega álagið heldur áfram að aukast og tíminn til endurhæfingar heldur áfram að minnka. Dagatalið er fullt en leikmennirnir eru tómir.“

Eiga engan fulltrúa 

Sem stendur er enginn fulltrúi leikmanna innan alþjóða handknattleikssambandsins. Leikmenn eiga sinn fulltrúa innan evrópska sambandsins, en hann er aðeins í ráðgefandi hlutverki og hefur ekkert raunverulegt vald.

„Handbolti er erfið íþrótt, það er hluti af leiknum, en það eru of mörg meiðsli og of margir sem höndla ekki álagið. Virðið leikmennina. Leikmennirnir eru manneskjur, við eigum rétt á því að stofna fjölskyldur. Álagið heldur áfram að aukast og undirbúningstímabilið er of stutt. Ákvarðanir eru teknar án samráðs við leikmenn.“

Leikmenn hafa því ekkert að segja um ákvarðanir sem eru teknar, eins og til dæmis þegar liðum í Meistaradeildinni verður fjölgað á næsta tímabili eða þegar nýir „Evrópuleikar“ verða settir á fót árið 2030.

„Við erum ekki bara hluti af leiknum, við erum hjartað í leiknum. Við krefjumst virðingar og sætis við borðið. Evrópsku handboltaleikmannasamtökin tala fyrir hönd leikmanna. Við stöndum saman og eigum skilið að rödd okkar heyrist. Það er löngu orðið tímabært að hlusta á leikmennina, byrjið núna, koma svo.“