Lofar að koma böndum á CNN

Warner Bros. Discovery rekur kvikmyndatökuver, streymisveituna HBO Max og þó nokkrar sjónvarpsstöðvar, þar á meðal CNN. Netflix vill kaupa kvikmyndatökuverin og HBO Max en sjónvarpsstöðvarnar yrðu áfram reknar í nýju félagi.

Ellison og stjórnendur Paramount vilja hins vegar kaupa allt klabbið og hafa leitað beint til hlutafjáreigenda WBD með hærra tilboð en Netflix. Paramount hafði áður boðið fram sambærilegt tilboð til stjórnar WBD en því tilboði var hafnað.

Sjá einnig: Reyna fjandsamlega yfirtöku á Warner Bros.

Í frétt Wall Street Journal segir að fljótt eftir að ljóst varð að stjórn WBD hefði samþykkt tilboð Netflix hafi Larry Ellison, sem rekur meðal annars Oracle og er einn auðugasti maður heims, hringt í Donald Trump, forseta Bandaríkjanna, og sagt við hann að ef kaupin færu í gegn myndi það koma verulega niður á samkeppni á markaði streymisveitna.

Þá fór David Ellison nýlega til Hvíta hússins þar sem hann ræddi WBD við embættismenn. Samkvæmt heimildarmönnum WSJ úr Hvíta húsinu hét Ellison því að ef hann stjórnaði WBD myndi hann gera umtalsverðar breytingar á rekstri CNN.

Fréttastöðin er vinsæll skotspónn Trumps og starfsmanna hans og Trump er sagður hafa ítrekað lýst því yfir við fólk sem stendur honum nærri að hann vilji að nýtt fólk eignist CNN og að breytingar verði gerðar á fréttastöðinni og umfjöllunum hennar.

Trump sagði á dögunum að möguleg kaup Netflix á Warner gætu orðið „vandamál“ vegna markaðsstöðu fyrirtækjanna.

Sjá einnig: Kaup Netflix á hluta Warner Bros. gætu reynst „vandamál“

Stjórn Warner segist ætla að halda sig við Netflix-tilboðið og reyna að stöðva yfirtöku Paramount.

Paramount, sem er móðurfélag CBS News, greiddi Trump sextán milljónir dala vegna viðtals 60 mínútna við Kamölu Harris, fyrrverandi varaforseta og þáverandi forsetaefni Demókrataflokksins, í aðdraganda kosninganna í fyrra.

Snerist máluð um það hvernig eitt svar hennar var klippt. Flestir lagasérfræðingar voru sammála um að Paramount myndi vinna dómsmálið sem Trump höfðaði gegn fyrirtækinu en þrátt fyrir það voru bætur greiddar.

Á sama tíma var Paramount að reyna að fá samþykki ríkisstjórnar Trumps vegna samruna við Skydance Media. Það samþykki var veitt skömmu eftir bótagreiðsluna.