Lof­samar starfið á Ís­landi og segir það van­metið: „Að mínu mati ótrú­legt“

Wi­egert hefur verið þjálfari stór­liðs Mag­deburgar frá árinu 2015 og undir hans stjórn núna spila þrír Ís­lendingar. Þeir Gísli Þor­geir Kristjáns­son, Ómar Ingi Magnús­son og Elvar Örn Jóns­son. Þjóðverjinn mun því fylgjast vel með gengi ís­lenska lands­liðsins á EM.

Undir stjórn Wi­egert hefur Mag­deburg hefur unnið allt sem hægt er að vinna, bæði heima fyrir sem og í Meistara­deild Evrópu. Þessi sigursæli þjálfari dáist að því starfi sem er unnið hér heima í hand­boltanum og því hvernig hér tekst stöðugt að fram­leiða hand­bolta­menn í heimsklassa.

„Ég tel að það sem þessi litla þjóð er að af­reka sé van­metið og er þá ekki að tala um litla þjóð á neikvæðan hátt,“ segir Wi­egert í hlað­varpsþættinum Ball­sam en til saman­burðar og með til­liti til íbúa­fjöldans á Ís­landi yrði Ís­land sex­tánda fjöl­mennasta borgin í Þýska­landi.

„Að mínu mati eru Færeyjar og Ís­lands frábært dæmi um það hverju er hægt að ná fram með góðu yngri flokka starfi og félags­stjórnun. Það er magnað hvernig smáríki eins og Ís­land getur stöðugt fram­leitt hand­bolta­menn í hæsta gæða­flokki sem láta að sér kveða í evrópska boltanum.“

Wi­egert telur að hægt sé að draga mikinn lær­dóm af því starfi sem unnið er hér heima í hand­boltanum og vær til í að sækja land og þjóð heim í þeim til­gangi.

„Það hvernig þeir fara að þessu er ótrúlegt að mínu mati. Ég myndi elska það að fara til Ís­lands og fylgjast með því hvernig félögin þar haga sínu starfi, hvernig þau fram­leiða svona marka hand­bolta­menn á þessari litlu eyju og gera þá til­búna fyrir deildir á borð við þýsku úr­vals­deildina.

Wi­egert telur ís­lenska lands­liðið eiga fína mögu­leika á komandi Evrópumóti en liðið mætir Ítalíu í dag í fyrsta leik sínum í F-riðli en að auki eru lands­lið Póllands og Ung­verja­lands í riðlinum.

„Við verðum að bíða og sjá hvort liðinu takist að komast í undanúr­slit og berjast um verð­laun. Það sem liðinu skortir kannski er breidd.“

Leikur Ís­lands og Ítalíu í F-riðli Evrópumótsins í hand­bolta hefst klukkan fimm í dag og verður lýst í beinni textalýsingu hér á Vísi. Okkar menn úti í Kristian­stad sjá svo um að færa okkur brakandi fersk viðtöl að leik loknum og í kvöld verður hægt að nálgast upp­gjör á leiknum með sér­fræðingum íþrótta­deildar Sýnar í hlað­varpinu Besta sætið.