„Fá­rán­legt ef við ætlum að fara breyta til“

Ísland endaði í fjórða sæti á nýafstöðnu Evrópumóti karla í handbolta eftir tap gegn Króötum í leiknum um bronsverðlaun í Herning í dag. Um er að ræða besta árangur íslenska landsliðsins á stórmóti síðan árið 2010 þegar að liðið endaði í þriðja sæti á EM í Austurríki. 

Handboltasérfræðingarnir Einar Jónsson og Rúnar Kárason voru sammála um að heilt yfir hafi íslenska landsliðið átt frábært mót á EM.

„Frábær árangur,“ sagði Einar Jónsson í Besta sætinu. „Markmiðið var að fara í undanúrslit, við náðum því og það finnst mér virkilega vel gert. Menn geta talað um að við höfum verið í auðveldari hluta mótsins, leiðin hafi verið greið og allt það en það þarf bara að skila sínu og niðurstaðan er bara góð.“

Þetta var þriðja stórmót Íslands undir stjórn Snorra Steins Guðjónssonar og tekur Einar eftir góðum bætingum milli móta. 

„Síðasta mót var framför frá mótinu þar á undan sem var lélegt að mínu mati. Það var fyrsta stórmót liðsins undir stjórn Snorra. Frammistaðan á HM í fyrra var góð en niðurstaðan ekki nógu góð. Núna í ár erum við búin að ná þessu markmiði sem búið er að reyna ná í ansi mörg ár. Að komast í undanúrslit.

Við erum búin að ná þessu núna, það er stórt skref og núna getum við farið að horfa lengra. Eftir ár sitjum við kannski hérna og segjum að fjórða sætið sé vonbrigði en þetta eru alls ekki vonbrigði núna, þetta er virkilega góð frammistaða og liðið er stöðugt að færast nær þessum bestu liðum. Við sjáum það.“

Framundan sé þó gríðarleg vinna.

„Það þarf að greina þetta mót og það býr hellingur í þessu liði. Ég tel að þetta lið geti náð lengra, alveg klárlega en það er eitt og annað að mínu mati sem þarf að breytast.“

Snorri Steinn skrifaði undir þriggja ára samning þegar að hann tók við landsliðsþjálfara stöðunni í júní árið 2023. Hann rennur sitt skeið eftir nokkra mánuði.

Er eitthvað annað sem kemur til greina en að HSÍ bjóði honum annan samning?

„Nei. Mér finndist það fáránlegt ef við ætlum að fara breyta eitthvað til,“ svaraði Rúnar og Einar bætti svo við:

„Ég myndi gefa honum samning fram yfir Ólympíuleikana 2028. En það er ekki nóg að henda bara í samning. Það þarf að gera kröfur, þarf að setja markmið og allt það. Við erum komin á þann stað að það er hægt að gera það. Að sjálfsögðu ætti hann að fá samning allavegana fram yfir Ólympíuleikana 2028, engin spurning. Þetta lið er á virkilega góðri leið og mér finnst þetta engin spurning.“

Sérfræðingarnir hafa ekki áhyggjur af því að Snorri Steinn fari nú að líta í kringum sig og taka mögulega við félagsliði.

„Ég held hann langi að vera í þessu starfi og búsettur á Ísland,“ sagði Rúnar og bætti við að utanfrá líti staðan þannig út að leikmenn treysti Snorra og hans hugmyndafræði og að það væri góður taktur í liðinu.

Þú getur hlustað á uppgjör Besta sætisins í spilaranum hér fyrir ofan eða á streymisveitum í gegnum hlekkina hér fyrir neðan: