Verk­falli Ronaldo lokið

Greint var frá því á dögunum að Ronaldo myndi ekki taka þátt í leik Al-Nassr gegn Al Riyahd sökum þess að hann væri óánægður með skort á leikmannakaupum hjá félaginu af hálfu PIF (opinbera fjárfestingarsjóðs Sádi-Arabíu) í samanburði við önnur félög í eigu sjóðsins, að því er heimildir ESPN hermdu.

Portúgalski framherjinn, sem hefur skorað 91 mark í 95 leikjum í sádi-arabísku úrvalsdeildinni fyrir Al-Nassr var sagður vonsvikinn yfir því að Al Nassr hafi ekki náð að styrkja liðið verulega í baráttunni um titilinn þar í landi. 

Ítalski félagsskiptasérfræðingurinn Fabrizio Romano greinir frá því í kvöld að Ronaldo sé mættur aftur til æfinga hjá Al-Nassr.

Fjarvera Ronaldo kom ekki að sök fyrir Al-Nassr í leik gærkvöldsins gegn Al-Riyahd því liðið vann eins marks sigur og var það Sadio Mané, fyrrverandi leikmaður Liverpool sem skoraði sigurmarkið á 40.mínútu. 

Al-Nassr er aðeins einu stigi frá toppliði Al-Hilal þegar að nítján umferðir hafa verið leiknar í sádi-arabísku deildinni.