„Þú stöðvar Pútín ekki með kossum og blómum“

Í færslu sem hann birti á samfélagsmiðlum í morgun segir Selenskí að það hafi verið gerð stór mistök með Rússland eftir að þeir innlimuðu Krímskaga og studdu aðskilnaðarsinna í austurhluta Úkraínu. Áður hafi mistök verið gerð eftir innrás Rússa í Georgíu og hernám þeirra á hluta landsins og enn áður hafi einnig verið gerð mistök þegar Rússar réðust á Téténíu.

„Mörg mistök voru gerð. Þess vegna vil ég ekki vera forsetinn sem gerir sömu mistök og forverar mínir og aðrir hafa gert,“ segir Selenskí. Hann segist ekki eingöngu vera að tala um Úkraínu heldur aðra leiðtoga sem leyfðu Rússum að stunda landvinninga undanfarna áratugi.

„Þú stöðvar Pútín ekki með kossum og blómum.“

Selenskí segir að hann hafi ekki reynt það hingað til og vilji því ekki reyna það núna. Það geti ekki verið rétta leiðin.

Hans ráð til allra sé að reyna ekki að friða Pútín. Það muni eingöngu fela í sér að eftir fimm ár muni rússneski forsetinn hafa endurbyggt og þjálfað her sinn á nýjan leik.

„Hann hefur misst mikið af vel þjálfuðu fólki. Hann er að missa þrjátíu til 35 þúsund menn á mánuði,“ segir Selenskí.

„Getið þið ímyndað ykkur þetta á 21. öldinni? Getið þið ímyndað ykkur, hann er að missa 35 þúsund manns í hverjum mánuði? Ég er ekki viss um að hann viti af því.“

Rússar hafa meðal annars krafist þess að úkraínskir hermenn hörfi frá því svæði sem þeir halda enn í Dónetsk-héraði í austurhluta Úkraínu. Þetta er mjög víggirt svæði og hefur Rússum gengið mjög illa að taka það með hervaldi.

Svæðið var á árum áður hernumið af Rússum og úkraínskum aðskilnaðarsinnum í austurhluta Úkraínu en Úkraínumenn náðu því aftur og hafa síðan þá byggt upp miklar varnir þar.

Úkraínumenn óttast að það að hörfa frá svæðinu myndi veita Rússum stökkpall lengra inn í Úkraínu, ákveði þeir seinna meir að gera aðra innrás í Úkraínu.

Tala um að taka mun stærri hluta af Úkraínu

Kröfur Rússa hafa ávallt verið meiri en þær að vilja Donbas-svæðið svokallaða, sem samanstendur af Dónetsk og Lúhansk-héruðum. Rússar hafa innlimað fimm héruð Úkraínu inn í rússneska ríkissambandið, samkvæmt breytingum sem gerðar voru á stjórnarskrá Rússlands á undanförnum árum. Um er að ræða Krímskaga, Kherson, Sapórisjía, Dónetsk og Lúhansk.

Af þessum héruðum stjórna Rússar eingöngu Krímskaga og Lúhansk að fullu.

Sergei Lavrov, utanríkisráðherra Rússlands, vísaði svo í vikunni til enn stærri hluta Úkraínu sem „sögulegs“ rússnesks landsvæðis og sagði að Rússar myndu á endanum koma höndum yfir öll slík svæði í Úkraínu.

Í ávarpi sem ráðherrann hélt vísaði hann til Krímskaga, Donbas og til svæðis sem er af Rússum kallað „Novorossia“. Það er nafn yfir allan suðurhluta Úkraínu sem notað var á tímum rússneska keisaraveldisins. Það svæði nær yfir alla strandlengju Úkraínu og mun stærri hluta landsins en Rússar gera þegar tilkall til.

„Drullist þið til Rússlands“

Í annarri færslu kallar Selenskí eftir frekari refsiaðgerðum gegn Rússlandi. Hann bendir til þess að Donald Trump, forseti Bandaríkjanna, hafi beitt ríkisrekin olíufyrirtæki Rússland og þakkar honum fyrir það. Þá kallar hann eftir frekari aðgerðum gegn orkuiðnaði Rússlands og sérstaklega kjarnorkuiðnaði landsins frá Trump. Það myndi senda sterk skilaboð til Evrópu.

Selenskí sagði Evrópu hafa gert mikið en aðgerða væri þörf gegn kjarnorkuiðnaði Rússlands, forsvarsmönnum hans, ættingjum þeirra og börnum. Mikið af þessu fólki byggi í Evrópu, börnin væru í skólum þar og þeir ættu fasteignir í Evrópu og Bandaríkjunum.

„Drullist þið til Rússlands. Farið heim. Þið virðið engan í Bandaríkjunum. Þið virðið ekki reglur. Þið virðið ekki lýðræði. Þið virðið ekki Úkraínu eða Evrópu. Farið heim.“